Ամերիկացի մարզական լրագրող Ալեքսանդր Քեյ Լին իր կանխատեսումն է ներկայացրել UFC-ի թեթև քաշային կարգում հանդես եկող Արման Ծառուկյանի և նորզելանդացի Դեն Հուկերի առաջիկա մենամարտի վերաբերյալ։
Հիշեցնենք, որ մարտը տեղի է ունենալու այսօր՝ նոյեմբերի 22-ին, Դոհայում (Կատար)՝ Երևանի ժամանակով մոտավորապես 00:40-ին։
MMA Fighting-ի իր սյունակում Քեյ Լին նշել է, որ թեև Ծառուկյանը հաղթանակի հասնելու մի քանի ուղի ունի, սակայն ամենաարդյունավետ մարտավարությունը ըմբշամարտն է։
«Եթե Արմանը կարծում է, որ վարկանիշային աղյուսակում 1-ին տեղը պահպանելու համար բավական է հաղթել «ամենաապահով» եղանակով, ապա նա չպետք է շեղվի ակնհայտ ծրագրից՝ տապալել Հուկերին գետնին վաղ և հաճախ։
Այո, հիմա Հուկերին այդքան էլ հեշտ չէ գերազանցել պայքարում։ Նրան գետնի վրա դոմինացնելու համար անհրաժեշտ է Իսլամ Մախաչևի նման մարտիկ։ Սակայն Ծառուկյանն այդ մակարդակից այնքան էլ հեռու չէ։ Եթե նա որոշի պայքարել, Դենը չի կարողանա կանգնեցնել նրան»։
Վերլուծաբանը նաև զգուշացրել է կանգնած դիրքում մենամարտելու վտանգների մասին․
«Կանգնած դիրքում Հուկերը կարող է մարտը հետաքրքիր դարձնել, եթե Ծառուկյանը թեկուզ փոքր-ինչ թուլանա։ Նորից եմ կրկնում՝ հավատում եմ, որ պայքարը Արմանի համար նպատակին հասնելու ամենաապահով ճանապարհն է։ Բայց «ապահովը» և «հեշտը» նույնը չեն։ Հեշտ չէ նետվել Հուքերի վրա, ով հարվածներ է տեղում մսաղացի պես»։
Ալեքսանդր Քեյ Լին կանխատեսում է Արման Ծառուկյանի հաղթանակը մրցավարների որոշմամբ։ Այնուամենայնիվ, նա դժվարացել է հստակ ասել, թե արդյոք սա Ծառուկյանին տիտղոսային մենամարտի հնարավորություն կտա՝ հաշվի առնելով UFC-ի անորոշ ծրագրերը 2026 թվականի համար։
