Բրազիլացի մարտիկ Ռենատո Մոյկանոն կարծիք է հայտնել Արման Ծառուկյանի մասին՝ պնդելով, որ Իլիա Տոպուրիան հեշտությամբ կհաղթեր նրան։
«Չեմ կարծում, որ Արման Ծառուկյանն այնքան ուժեղ է, որքան նրա մասին խոսում են։ Իլիա Տոպուրիան, կարծում եմ, առանց մեծ դժվարության կհաղթեր նրան։ Ես ոչինչ չունեմ Արմանի դեմ, բայց նա համակրանք չի առաջացնում։ Նա այն մարդը չէ, որի հետ կցանկանայի ընկերություն անել։ Ծառուկյանը չափազանց ամբարտավան է, և ես չեմ սիրում մարդկանց, ովքեր իրենց մյուսներից վեր են դասում», —Մոյկանոյի խոսքն է մեջբերում Red Corner MMA-ը։
Արման Ծառուկյանը UFC-ի թեթև քաշային կարգի վարկանիշի երկրորդ համարն է։ Նրա վերջին մենամարտը տեղի է ունեցել 2024 թվականի ապրիլին, որտեղ նա մրցավարների բաժանված որոշմամբ հաղթել է Չարլզ Օլիվեյրային։ Հունվարին Ծառուկյանը վնասվածքի պատճառով դուրս է եկել Իսլամ Մախաչևի դեմ մենամարտից։ Նրա պրոֆեսիոնալ ռեկորդը 22-3 է։
UFC-ի թեթև քաշային կարգի նոր չեմպիոնը Իլիա Տոպուրիան է։ 2025 թվականի հունիսին իսպանական դրոշի ներքո հանդես եկող վրացի մարտիկը նոկաուտով հաղթել է Չարլզ Օլիվեյրային և նվաճել գոտին։ Տոպուրիայի MMA ռեկորդը 17-0 է։ Նախկինում նա եղել է UFC-ի փետուր քաշային կարգի չեմպիոն։
