«Ունիվերսիտատեա Կլուժի» 37-ամյա կիսապաշտպան Դան Նիստորը խոսել է Կոնֆերենցիաների լիգայի երկրորդ որակավորման փուլի առաջին խաղի մասին, որտեղ իր թիմը Երևանում 0:0 հաշվով ոչ-ոքի է խաղացել «Արարատ-Արմենիայի» հետ։
83 րոպե խաղադաշտում անցկացրած վետերան ֆուտբոլիստը խոստովանել է, որ «Ու Կլուժը» թույլ հանդիպում է անցկացրել, հատկապես երկրորդ խաղակեսում, երբ տանտերերը գերակշռել են և մի քանի վտանգավոր պահեր ստեղծել, այդ թվում՝ դիպչելով դարպասաձողին։ Այնուամենայնիվ, Նիստորը վստահ է, որ պատասխան խաղում իր թիմը կշտկի սխալները և կանցնի հաջորդ փուլ։
«Սա մեր առաջին եվրոպական խաղն էր երկար դադարից հետո։ Մենք չափազանց սեղմված էինք, որոշ պահերին՝ նույնիսկ վախեցած։ Հնարավոր է՝ դա պայմանավորված էր եվրոպական մակարդակի խաղի ճնշմամբ, քանի որ մեր որոշ խաղացողներ նման փորձ չեն ունեցել։ Բայց կարևորն այն է, որ գոլ բաց չթողեցինք», — նշել է Նիստորը։
Խոսելով մրցակցի մասին՝ նա ընդգծել է. «Եթե մենք վատ խաղացինք, ապա նրանք լավ խաղացին։ «Արարատ-Արմենիան» ցույց տվեց իր ուժը։ Հուսով ենք, որ Կլուժում կկարողանանք ավելի շատ խնդիրներ ստեղծել նրանց համար, կունենանք ավելի շատ գոլային պահեր և կհաղթենք»։
Նիստորը նաև խոստովանել է, որ թիմը ընդմիջումից հետո կորցրել է կենտրոնացվածությունը, ինչը երկրորդ խաղակեսում հանգեցրել է դժվարությունների։
«Հավանաբար, մենք չափից շատ էինք թուլացել ընդմիջման ժամանակ։ Բայց վստահ եմ, որ տանը կխաղանք շատ ավելի լավ։ Թղթի վրա մենք ֆավորիտ էինք, բայց ֆուտբոլում դա միշտ չէ, որ կարևոր է։ Պատասխան խաղում պետք է ավելի ուշադիր լինենք», — ավելացրել է նա։
Կիսապաշտպանը ափսոսանք է հայտնել, որ չեն կարողացել ուրախացնել Երևան ժամանած երկրպագուներին, սակայն ընդգծել է նրանց աջակցության կարևորությունը։ «Մեր երկրպագուները հիանալի էին։ Վստահ եմ՝ նրանց աջակցությամբ տանը կանցնենք այս փուլը», — ասել է Նիստորը gsp.ro-ին տված հարցազրույցում։
