ՈւԵՖԱ Կոնֆերենցիաների լիգայի որակավորման երկրորդ փուլում «Արարատ-Արմենիան» կհանդիպի ռումինական «Ունիվերսիտատեա Կլուժին»։
Խաղից առաջ ռումինական ակումբի գլխավոր մարզիչ Իոան Սաբեուն վերլուծել է մրցակցին և նշել այն առանցքային կողմերը, որտեղ իր թիմը պետք է գերազանցի՝ հաղթանակի հասնելու համար։
««Արարատ-Արմենիան» նոր մարզչական շտաբով թիմ է՝ բրազիլացի և պորտուգալացի խաղացողներով, որոնք առանձնանում են բարձր անհատական որակներով։ Դիտել ենք նրանցից մեկ հանդիպում և կարողացել ենք որոշակի վերլուծություն կատարել։ Պարզ է, որ նրանք ունեն խաղացողներ, որոնք ձգտելու են տպավորել նոր մարզչին։ Հատկապես եզրային գոտիներում նրանք ունեն որակյալ ֆուտբոլիստներ։
Մենք պետք է համապատասխանենք մրցաշարի մակարդակին՝ ինչպես հոգեբանական պատրաստվածությամբ, այնպես էլ մոտիվացիայով։ Խաղացողներից ակնկալում եմ խիզախություն՝ որոշումներ կայացնելու հարցում։ Երևանում սպասվում է շոգ եղանակ, ուստի պետք է հարմարվենք և խելացի խաղ ցուցադրենք։ Քանի որ սա երկու խաղերից բաղկացած փուլ է, մենք պետք է հավասարակշռված մոտեցում ցուցաբերենք։ Շատ կարևոր է գոլ չընդունել, բայց դա չի նշանակում, որ միայն պաշտպանվելու ենք։ Պաշտպանության կենտրոնում պետք է գտնեմ օպտիմալ լուծում՝ խոսելով կենտրոնական կիսապաշտպաններ Կոդրեայի և Արտեանի հետ՝ հասկանալու, թե ով կստանձնի ավելի մեծ պատասխանատվություն։
Մեր նպատակը ոչ թե շոու ստեղծելն է, այլ հաջորդ փուլ անցնելը։ Պետք է խելացի խաղանք և օգտվենք մեր ֆուտբոլիստների փորձից։
Հույս ունեմ, որ կգտնեմ լավագույն լուծումները։ Կարևոր է, որ մեր մասնակցությունը պարզապես ներկայություն չլինի։ Սա կարևոր փորձ է այն խաղացողների համար, ովքեր դեռ չեն խաղացել եվրոպական գավաթներում։ Պետք է խաղադաշտ դուրս գանք էներգիայով, վստահությամբ և խիզախությամբ։ Թեև դեռ լավագույն մարզավիճակում չենք, սակայն, հաշվի առնելով, որ արդեն երկու հանդիպում ենք անցկացրել առաջնությունում, դա կարող է նույնիսկ առավելություն լինել։
Հիանալի է տեսնել, թե որքան նվիրված երկրպագուներ ունենք և որքան են նրանք սիրում մեր թիմը։ Սա աներևակայելի էներգիա է, որը պետք է փոխանցվի նաև մեզ։ Մենք պետք է գիտակցենք, թե որքան մարդ է կանգնած թիմի կողքին և որքան կրքոտ են նրանք։ Մենք արդեն հպարտացրել ենք նրանց և ցանկանում ենք կրկին ուրախություն պարգևել՝ հաշվի առնելով այն զոհողությունները, որ նրանք կատարել են մեզ հետ լինելու համար»,- մասնագետի խոսքն է մեջբերում ակումբի պաշտոնական կայքը։
Հանդիպումը կկայանա այսօր՝ հուլիսի 24-ին, Ավանի ֆուտբոլի ակադեմիայի մարզադաշտում։ Խաղը կմեկնարկի 20:00-ին։
