«Տոտենհեմի» նորանշանակ գլխավոր մարզիչ Թոմաս Ֆրանկը նշել է, որ իր ղեկավարությամբ թիմը անպարտելի չի լինելու և հաստատ պարտություններ կունենա։ 51-ամյա մասնագետը ժպիտով ավելացրել է, որ սխալ էր նույնիսկ հիշատակել «Արսենալին»՝ որպես անպարտելի թիմի օրինակ։
«Մարզչական աշխատանքով զբաղվում եմ արդեն երկար տարիներ և հիանալի գիտեմ, որ սա մեծ ակումբ է, և ինձնից բարձր սպասելիքներ կլինեն։
Ինչպես բոլոր աշխատակիցներին ասացի հենց առաջին օրը՝ մի բան կարող եմ 100 տոկոսով խոստանալ․ մենք պարտվելու ենք։ Ես երբեք չեմ տեսել մի թիմ, որը երբևէ չպարտվի։ Կար «Արսենալը» (2003/04 մրցաշրջանում ակումբը դարձավ Պրեմիեր լիգայի չեմպիոն՝ առանց պարտության), բայց չէ… չպետք է դա ասեի։ Ահա իմ առաջին՝ նորեկին բնորոշ սխալը։
Եղել է նաև «Փրեսթոնը» (1889 թվականին), և միայն այդ երկու թիմերն են, որոնք մրցաշրջանն ավարտել են առանց պարտության»,– Ֆրանկի խոսքերը մեջբերում է Goal-ը։
«Տոտենհեմը» նրա նշանակման մասին հայտարարեց հունիսի 12-ին։ Դանիացու հետ պայմանագիրը նախատեսված է մինչև 2028 թվականը։
