Չեմպիոնների լիգայի 2024/2025թթ․ խաղարկության քառորդ եզրափակիչում Միլանի «Ինտերը» հաղթահարեց Մյունխենի «Բավարիայի» արգելքը՝ ընդհանուր 4:3 հաշվով հաղթելով մրցակցին։ Այդ կապակցությամբ «ներաձուրիների» հայ կիսապաշտպան Հենրիխ Մխիթարյանը կիսվել է տպավորություններով։
«Այո, սա մեր լավագույն խաղերից մեկն էր: Մենք անչափ ուրախ ենք, որ անցանք հաջորդ փուլ: Մենք արժանի էինք դրան, քանի որ շատ աշխատեցինք, զոհաբերեցինք ամեն ինչ և ցույց տվեցինք իսկական թիմային ոգի:
Իհարկե, մենք հպարտ ենք այս ձեռքբերումով, բայց սրանով չենք սահմանափակվում:
Հիմա մեր ուշադրությունը կենտրոնացած է «Բոլոնիայի» հետ խաղի վրա, իսկ հետո կմտածենք «Բարսելոնայի» դեմ հանդիպման մասին:
Այս հաջողությունը մեզ ուրախացնում է, բայց մենք գիտենք, որ կարող ենք ավելին անել: Ինչպես ասացի մամուլի ասուլիսում, մեզ չեն հետաքրքրում դաշտից դուրս խոսակցությունները: Մենք գիտենք, թե որքան ենք աշխատում, և հավատում ենք, որ ամեն ինչ անում ենք առաջ գնալու համար՝ անտեսելով արտաքին քննադատությունները: Պատմելու կարիք չկա, ամեն ինչ տեսանելի է դաշտում: Մեր թիմային ոգին, միմյանց համար պայքարելու կամքը և յուրաքանչյուր խաղում հաղթելու ցանկությունը ակնհայտ են՝ անկախ մրցակցից:
Այսօր, երբ պարտվում էինք 1։0 հաշվով, ինչը հեշտ վիճակ չէր, խիզախություն և անհատականություն ցուցաբերեցինք՝ խփելով երկու գոլ և առաջ անցնելով: Թեև հետո գոլ բաց թողեցինք, և նրանք հավասարեցրին հաշիվը, մենք ապացուցեցինք, որ արժանի ենք հաջորդ փուլ դուրս գալուն։
Շատերն են խոսում, բայց դա ինձ բացարձակապես չի հետաքրքրում:
Ես գիտեմ, թե ինչպես ենք աշխատում, գիտեմ իմ թիմակիցների որակը և տեսնում եմ, թե որքան նվիրվածությամբ ենք պատրաստվում յուրաքանչյուր մարզման ժամանակ: Այդ պատճառով ասացի այդ խոսքերը և չեմ ամաչում ասածներիս համար, որովհետև մեր արածն ակնհայտ է բոլորին: Մեզ պետք չէ արդարանալ, քանի որ մենք շարունակում ենք պայքարել: Մենք Չեմպիոնների լիգայի կիսաեզրափակչում ենք և ցանկանում ենք ավելի հեռուն գնալ:
Չեմ ցանկանում կրկնել ասվածս: Ասել եմ՝ վերջ: Չեմ ուզում վիճել»,- Մխիթարյանի խոսքն է մեջբերում Sport Italia-ն։
: “ ‼️”
Henrikh #Mkhitaryan , centrocampista dell’ #Inter , ha parlato così dopo il passaggio alle semifinali di #ChampionsLeague ️⚫️
@tancredipalmeri #Sportitalia pic.twitter.com/msAqGm1Xy8
— Sportitalia (@tvdellosport) April 16, 2025
