«Ալբերտ Ազարյանն իսկապես շատ հզոր անձնավորություն էր։ Նա մեծ հայ էր ու հայի ճիշտ կերպարը ներկայացնում էր թե՛ Հայաստանում, թե՛ Հայաստանից դուրս»։ Այս մասին լրագրողների հետ զրույցում ասել է անվանի հեռացատկորդ, Հայաստանի աթլետիկայի ֆեդերացիայի նախագահ Ռոբերտ Էմմիյանը։
«Ինձ համար իսկապես շատ ծանր օր է, քանի որ հրաժեշտ ենք տալիս պարոն Ալբերտ Ազարյանին։ Ես երևի այն երջանիկ մարզիկներից եմ, որ երկար տարիներ լինելով սպորտում՝ հնարավորություն եմ ունեցել ճանաչելու Ալբերտ Ազարյանին, շփվելու իր հետ ու երկար ճանապարհ անցնելու միասին։ Ալբերտ Ազարյանն իսկապես շատ հզոր անձնավորություն էր։ Նա մեծ հայ էր ու հայի ճիշտ կերպարը ներկայացնում էր թե՛ Հայաստանում, թե՛ Հայաստանից դուրս։ Ամեն տեղ մենք հպարտացել ենք իր անցած ճանապարհով ու փորձել ենք իր նման բարձր պահել մեր եռագույնը»,- ասում է Ռոբերտ Էմմիյանը։
Եվրոպայի, ԽՍՀՄ-ի ու հանրապետության բազմակի չեմպիոն, Բարի կամքի խաղերի հաղթող, Եվրոպայի ռեկորդակիր Ռոբերտ Էմմիյանը նաև շնորհակալություն է հայտնում հայ մարզասերին՝ Ալբերտ Ազարյանին կենդանության օրոք մեծարելու և գնահատելու համար․ «Մեծատառով մարդ էր։ Միասին բազմաթիվ միջազգային մրցումների ենք մասնակցել: Ինձ համար մեծ պատիվ էր նրա ձեռքը սեղմելն ու նրան ճանաչելը։ Ցավակցում եմ պարոն Ազարյանի հարազատներին ու հայ ժողովրդին, քանի որ կորցրեցինք իսկապես մեծ հայի։ Մյուս կողմից էլ ուրախալի է, որ հայ մարմնամարզիկները գնում են իր հետքերով, ունենում ենք նշանակալի հաջողություններ այս մարզաձևում։ Աստված տա՝ իր ձեռագիրը տարածվի ամբողջ աշխարհում ու մեր մարմնամարզիկները նոր հաղթանակներ կերտեն»։
Հիշեցնենք՝ Ալբերտ Ազարյանի վերջին հրաժեշտը տեղի կունենա սեպտեմբերի 9-ին՝ ժամը 11:00-13:00-ը Կոնդի Սուրբ Հովհաննես եկեղեցում, ժամը 13:00-13:30-ը՝ Ալբերտ Ազարյանի անվան մանկապատանեկան մարզադպրոցում (հասցե՝ Մոսկովյան 3):
Ալբերտ Ազարյանի աճյունը կամփոփվի Կոմիտասի անվան պանթեոնում. հուղարկավորությունը՝ ժամը 14:00-ին: