Կինոյի տան մեծ դահլիճում նախօրեին կայացել է օլիմպիական եռակի չեմպիոն Ալբերտ Ազարյանին նվիրված «Ես բացեցի թևերս» վավերագրական ֆիլմի պրեմիերան։
Ստեղծագործական թիմի անդամները Երևանի թատրոնի և կինոյի պետական ինստիտուտի ուսանողներն են։
Ֆիլմի պրեմիերային ներկա են եղել ԵԹԿՊԻ ռեկտոր Սառա Նալբանդյանը, կինոյի ֆակուլտետի դեկան Անետա Երզնկյանը, ինչպես նաև Եվրոպայի կրկնակի չեմպիոն, Օլիմպիական խաղերի բրոնզե մեդալակիր Արթուր Դավթյանը, Մարմնամարզության աշխարհի գավաթի 2023 թվականի հաղթող Վահագն Դավթյանը, Եվրոպայի կրկնակի չեմպիոններ Հարություն Մերդինյանը և Էրիկ Բաղդասարյանը, նրանց մարզիչները, մարզիկներ, մարզասերներ:
Ստեղծագործական թիմի անդամները նշում են՝ ուժ ու եռանդ են ստացել լեգենդար Ալբերտ Ազարյանի վստահությունից:
«Պարոն Ազարյանի հետ աշխատելը մեծ պատասխանատվություն էր։ Մենք էլ ուժ ու եռանդ ստացանք, որ նա մեզ վստահեց։ Նաև շնորհակալ եմ բոլոր այն հովանավորներին, բոլոր այն մարդկանց, ովքեր հավատացին մեզ և սատար կանգնեցին»,- ասում է ֆիլմի պրոդյուսեր Դավիթ Ջինանյանը:
Ֆիլմի ռեժիսորը Երևանի թատրոնի և կինոյի պետական ինստիտուտի ուսանող Սոնա Սարիբեկյանն է: Ասում է՝ Ալբերտ Ազարյանի հետ աշխատելու հնարավորությունը նաև մեծ պատասխանատվություն էր իրենց համար:
«Մեծագույն պատիվ, հպարտություն և էլ ավելի մեծ պատասխանատվություն էր Ալբերտ Ազարյանի հետ աշխատելը։ Կարծում եմ, որ լեգենդար անձնավորության մասին ֆիլմ նկարելու հնարավորությունը մեր երիտասարդ թիմի համար հետագայում ուղենշային կդառնա։ Շնորհակալություն եմ հայտնում մեր թիմի անդամներին և բոլոր այն մարդկանց, ովքեր իրենց ներդրումն ունեն ֆիլմի կայացման գործում»,- նշել է ֆիլմի ռեժիսոր Սոնա Սարիբեկյանը։
«Ես բացեցի թևերս» վավերագրական ֆիլմը պատմում է օլիմպիական խաղերի եռակի, աշխարհի քառակի, Եվրոպայի կրկնակի ու ԽՍՀՄ 11-ակի չեմպիոն Ալբերտ Ազարյանի անցած սպորտային ճանապարհի ու կյանքի մասին՝ սկսած Վանաձորում դարբնի աշխատանքից մինչև սպորտային ամենաբարձր կոչումների նվաճումը։ Ֆիլմում հատվածներ են մեջբերված նաև Յուրի Երզնկյանի «Փառքի օղակներ» ֆիլմից, որտեղ Ալբերտ Ազարյանը մարմնավորել է իր իսկ կերպարը։
Ֆիլմի ստեղծմանն աջակցել են Հայկական բարեգործական ընդհանուր միությունը, Հայաստանի ազգային օլիմպիական կոմիտեն, Երևանի թատրոնի և կինոյի պետական ինստիտուտը, Երևանի քաղաքապետարանը, Կինոյի տունը։
GALLERY
