Եթե դուք կարծում եք, որ կորոնավիրուսը այս օրերի ամենախոշոր իրադարձությունն է, ապա շտապում ենք ձեզ հիասթափեցնել: Մեր իրականությունում կա շատ ավելի ազդեցիկ մի բան:
Ի տարբերություն կորոնովիրուսի՝ արցունքները ձեր աչքերից հոսելու են ոչ թե վատառողջության, այլ դարպասի գրավումների և ֆուտբոլիստների վարպետության շնորհիվ:
Այո, նախորդ շաբաթ վերսկսվեց Հայաստանի Բարձրագույն խմբի առաջնությունը: Ինչպես ասում էին հին գոթերը՝ չես կարող խոսել ապագայի մասին, եթե չես ուսումնասիրել անցյալը: 16-րդ տուրը մեզ պարգևեց բազում հետաքրքրիր դրվագներ:
Այսօր կդիտարկենք նախորդ հանդիպումների արդյունքները՝ դրանք տարածելով այս տուրի սպասվելիք խաղերի վրա:
«Նոա» (24 միավոր-6-րդ հորիզոնական) —«Փյունիկ» (23 մ.-7-րդ հ.) Մարտի 7, 14:15
Մենք ականատես ենք լինելու «ոխերիմ» հարևանների հակամարտությանը: Մրցաշարային աղյուսակում նրանց միմյանցից բաժանում է ընդամենը 1 միավոր: Առաջնության նոր ֆորմատը թելադրում է, որ չեմպիոնական պայքարին կարող են մասնակցել առաջին վեցնյակի թիմերը:
Եվ այսպես, ճամփաբաժանին գտնվող ակումբների պայքարը չափազանց թեժ է լինելու:
Գարնանային առաջին խաղում «Նոան» մրցեց «Շիրակի» հետ (0:3): Երևանյան ակումբը չկարողացավ մրցակցի հարկի տակ ցուցադրել իրեն բնորոշ կոմբինացիոն ֆուտբոլը: Թիմի գլխավոր մարզիչ Վադիմ Բորեցը խաղադաշտ էր դուրս բերել 3 նորեկների ՝ Էդուարդս Էմսիսին, Ռոկաս Կրաուշնաուսկասին և Դանու Սպետաուրային: Կարող ենք նշել, որ այս գաղափարը չտվեց սպասված արդյունքը:
Նկատվում էր խաղակցվածության բացակայություն, ինչն էլ ազդեց հանդիպման ելքի վրա: Աշնանը հավասարակշռված ֆուտբոլ ցուցադրող «Նոան» նման չէր իրեն:
Այսպիսով, «Փյունիկի» դեմ խաղում կարող ենք սպասել «հին գվարդիայի» վերադարձին:
«Փյունիկն» իր առաջին հանդիպումը անցկացրեց «Գանձասար-Կապանի» հետ (2:0):
Նորանշանակ մարզիչ Ռոման Բերեզովսկու տրամադրության տակ կրկին հայտնվել էին Հայաստանի ազգային հավաքականի ֆուտբոլիստները՝ Արաս Օզբիլիսը և Կառլեն Մկրտչյանը: Հենց նրանք էլ դարձան այս հանդիպման գոլերի հեղինակները:
Հետխաղյա մամուլի ասուլիսում Բերեզովսկին նշեց, որ նրանք պարտավոր են հայտնվել լավագույն վեցնյակի մեջ: Հաշվի առնելով թիմի կազմը և նորանշանակ մարզչի խարիզման՝ այդ նպատակը այդքան էլ անիրական չի թվում:
«Նոայի» դեմ հանդիպումը կարող է դառնալ այն կամուրջը, որը «Փյունիկին» կներառի չեմպիոնական պայքարի մեջ:
«Գանձասար-Կապան» (14 մ. — 9-րդ հ.) —«Ալաշկերտ» (30 մ.- 2-րդ հ.) Մարտի 6, 15:15
Կապանյան թիմի մասին շատ ասելիք չկա: Իհարկե, կարող ենք խոսել «Փյունիկի» դեմ խաղում գրանցված տհաճ միջադեպի ՝ բղավոցների և հայհոյանքների մասին, սակայն, դա ենթաֆուտբոլային դրվագ է:
Նշենք, որ այդ հանդիպումը մրսածության պատճառով բաց թողեցին կապանյան թիմի մի քանի առաջատար ֆուտբոլիստներ, ինչը միգուցե և ազդեց խաղի ելքի վրա:
Թիմը դեռևս աշնանային հատվածում զրկվել էր վեցնյակում հայտնվելու ռեալ հնարավորությունից: Այդուհանդերձ, հասկանալի է, որ նրանք չեն պատրաստվում վայր դնել «զենքերը» և առանց պայքարի զիջել մրցակիցներին:
«Ալաշկերտը» ծայրահեղ ծանր հանդիպում անցկացրեց «Երևանի» հետ ՝ հաղթելով 3:0 հաշվով: Իհարկե, սա կատակ էր:
Թիմը բառացիորեն հանգստանում էր նախորդ տուրում, քանի որ առաջնությունը լքած «Երևանի» դեմ հանդիպումների արդյունքը բոլոր ակումբների համար էլ նույնն է լինելու ՝ 3:0:
Հայաստանի գործող գավաթակիրը ձմռանը մի քանի որակյալ տրանսֆերներ իրականացրեց: Ակումբի կազմի ամենաթարմ շտրիխն էլ եղավ Հայկ Իշխանյանի և Էդգար Մանուչարյանի վերադարձը: Հստակ է, որ «Ալաշկերտն» այս տարի լրջորեն պայքարելու է չեմպիոնական տիտղոսի համար:
«Արարատ-Արմենիա» (30 մ. -1-ին հ.) — «Շիրակ» (28 մ.- 3-րդ հ.) Մարտի 7, 15:00
Հայաստանի գործող չեմպիոնը «Արարատի» դեմ արտագնա հանդիպման ընթացքում (0:3) ցույց տվեց, որ այս մրցաշրջանում էլ լինելու է չեմպիոնական տիտղոսի գլխավոր հավակնորդը: Ուշագրավ է, որ Վարդան Մինասյանի թիմը չգնաց մոդայիկ ճանապարհով և չունեցավ մեծ թվով նորեկներ: Եվ այս ամենը այն դեպքում, երբ ակումբը իր ֆինանսական կարողություններով գերազանցում է շատերին:
Թիմը համալրեցին երեք նորեկներ, որոնցից մեկը ՝ Յուսուֆ Օտուբանջոն դարձավ 2 գոլի հեղինակ: Կարող ենք ենթադրել, որ այս երիտասարդը նոր շունչ կհաղորդի մեր առաջնությանը ու լուրջ ներդրում կունենա «Արարատ-Արմենիայի» հավանական չեմպիոնության մեջ:
Չեմպիոնական ամբիցիաների փորձաքարերից մեկն էլ ՝ «Շիրակի» դեմ հանդիպումն է:
Միայն այն փաստը, որ խաղադաշտում միաժամանակ կհայտնվեն ՝ Օտուբանջոյի և Մորի Կոնեի նման ռմբարկուներ, այս խաղը արժանի է դարձնում ձեր ուշադրությանը:
Հաղթանակի դեպքում «Շիրակը» կարող է շրջանցել իր մրցակցին և կարճ ժամանակով գլխավորել մրցաշարային աղյուսակը: Իսկ խոսել այն մասին, թե առաջատար «Արարատ-Արմենիայի» համար որքան կարևոր է այս հաղթանակը ՝ ավելորդ է: Կարող ենք ենթադրել, որ մեզ իրական «մսաղաց» է սպասվում:
«Արարատ» (27 մ. — 5-րդ հ.) —«Լոռի» (28 մ. — 4-րդ հ.) Մարտի 8, 14:45
Հանդիպում են նախորդ տուրի երկու անհաջողակները: Առաջնության երկրորդ հատվածը «Լոռին» սկսեց առաջին դիրքից: Սակայն, Ալեքսանդր Գրիգորյանի թիմից կրած պարտությունը նրանց հետ գցեց աղյուսակի չորորդ հորիզոնական:
Այդ հանդիպումից հետո, «Լոռիի» գլխավոր մարզիչ Դավիդ Կամպանյան խոստովանեց, որ ֆուտբոլիստները չէին հետևում իր ցուցումներին: Թիմում կադրային փոփոխություններ են եղել և նոր դիրքերում հայտնված ֆուտբոլիստները նյարդային և անվստահ խաղ էին ցուցադրում:
Տրանսֆերային շուկայում իր ակտիվությամբ մրցակցին չէր զիջում նաև «Արարատը»: Ակումբում հայտնվել են 8 նոր ֆուտբոլիստներ, 7-ը ՝ հեռացել:
Այս երկկողմանի երթևեկության մեջ ուշագրավ տեղ է զբաղեցնում թիմի նորանշանակ գլխավոր մարզիչը ՝ Իգոր Կոլիվանովը: Փորձառու մասնագետը պետք է կարողանա այս «բազմաշերտ խմորից որևէ համեղ քաղցրավենիք ստանալ»:
Չնայած անհաջող մեկնարկին, երկու թիմերն էլ գտնվում են բարձր հորիզոնականներում և խաղային ձեռագիրը վերականգնելու դեպքում կարող են խառնվել մրցաշարային աղյուսակի Օլիմպոսում ընթացող պայքարին:
«Ուրարտու» (10 մ. — 8-րդ հ.) — «Երևան» (0 մ. — 10-րդ հ.) +- (3:0)
Շնորհավորում ենք Ալեքսանդր Գրիգորյանին: Միգուցե, սա նրա մարզչական կարիերայի ամենահեշտ 3 միավորներն են: Վստահ եմ ՝ այս նախադասությանը դեռ շատ կհանդիպեք: Կփոխվեն միայն մարզիչների անունները:
Դե ինչ, իրական թագավորական ֆուտբոլը (կորոնաֆուտբոլը) սպասում է ձեզ:
Նարեկ Գրիգորյան
