Էրլինգ Հոլանդը պատասխանել է իր վերաբերյալ քննադատություններին՝ 5-խաղյա գոլազուրկ շարքից հետո:
«Մանչեսթեր Սիթին» պատմության մեջ առաջին անգամ նվաճեց Չեմպիոնների լիգայի գավաթը՝ եզրափակիչում 1-0 հաշվով հաղթելով «Ինտերին»: 22-ամյա նորվեգացի հարձակվողը բոլոր մրցաշարերում թիմի վերջին 5 խաղերում գոլ չի խփել։ Սակայն, միևնույնն է, նա 52 գոլ ունի իր ակտիվում այս մրցաշրջանում անցկացրած 53 խաղում:
«Այո, ես ճնշման տակ էի, այդ թվում՝ Պրեմիեր լիգայի հանդիպումներում, քանի որ ինձնից առաջ թիմը երկու անգամ անընդմեջ հաղթել է այն։ Նման ֆոնի վրա թիմին միանալն ու առաջնությունում չհաղթելը, եթե ոչ աղետ, ապա ոչ շատ հաճելի իրադարձություն կլիներ։ Այսպիսով, վերջին մի քանի շաբաթներն ինձ համար շատ դժվար էին: Հիմա թեթևություն եմ զգում։
Թիմի մեծ մասը 2 տարի առաջ խաղացել է Չեմպիոնների լիգայի եզրափակչում և շատ բան սովորել այդ ժամանակ։ Ֆուտբոլիստները շատ բանի միջով են անցել և շատ ավելի փորձառու են դարձել: Նայեք մեր մրցաշրջանին. «Արսենալը» Պրեմիեր լիգայի առաջատարն էր, իսկ Չեմպիոնների լիգայում մենք դիմակայում էինք «Բավարիային» և «Ռեալին», որոնք բազմիցս հաղթել են մրցաշարում։ Եվ մենք գիտեինք, որ այս բոլոր հանդիպումներին պետք է հոգեբանորեն պատրաստ լինենք։ Գուցե շատ գեղեցիկ չխաղացինք, բայց հաղթեցինք։ Ամենակարևորն արդյունքն է։
Ինչ վերաբերում է գոլազուրկ շրջանին, ապա մի մոռացեք, որ ես 22 տարեկան եմ, հիշեք ձեզ այդ տարիքում»,- ասել է Հոլանդը CBS Sports-ին:
Հարցազրուցավարներն էին նախկին ֆուտբոլիստներ Թիերի Անրին, Ջեյմի Կարագերը և Մայկա Ռիչարդսը։
