«Մանչեսթեր Սիթիի» հարձակվող Էրլինգ Հոլանդը խոսել է այս մրցաշրջանում «քաղաքայինների» թրեբլի նվաճման հնարավորության մասին։
«Ինձ ձեռք են բերել Չեմպիոնների լիգայում հաղթելու համար. Դա չպետք է մոռանալ։ Նման մրցաշարում հաղթելը շատ բան կնշանակի բոլորիս համար։ Ամեն ինչ կանեմ, որպեսզի իմ թիմը թրեբլի հեղինակ դառնա։ Սա իմ ամենամեծ երազանքն է, թեև մեզ համար հեշտ չի լինի։
Մեզ երկու եզրափակիչ է սպասվում այնպիսի թոփ թիմերի դեմ, որոնք կցանկանան կանգնեցնել մեզ։ Նրանք մոտիվացված և պատրաստ կլինեն։ Մենք պետք է հանդես գանք մեր ուժերի ներածին չափով։ Այդ դեպքում մենք հաջողության լավ հնարավորություն կունենանք»,- Հոլանդի խոսքերն է մեջբերում BBC Sport-ը։
Այս մրցաշրջանում Հոլանդը «Մանչեսթեր Սիթիի» կազմում բոլոր մրցաշարերում անցկացրել է 51 հանդիպում՝ դառնալով 52 գոլի և 9 գոլային փոխանցման հեղինակ:
Հիշեցնենք, որ շաբաթ օրը՝ հունիսի 3-ին, «Մանչեսթեր Սիթին» Անգլիայի գավաթի եզրափակչում կխաղա «Մանչեսթեր Յունայթեդի» հետ, իսկ հաջորդ շաբաթ օրը՝ հունիսի 10-ին, «քաղաքայինները» Չեմպիոնների լիգայի վճռորոշ խաղում կհանդիպեն «Ինտերի» հետ։ Նախկինում Խոսեպ Գվարդիոլայի սաները հաղթել էին Անգլիայի Պրեմիեր լիգան։