ՀՀ կրթության, գիտության, մշակույթի և սպորտի նախարարությունը 2023 թ. մարտի 15-ից հայտարարում է արտադպրոցական ուսումնական հաստատությունների մանկավարժական աշխատողների կամավոր ատեստավորման հայտերի ընդունելության մեկնարկի մասին: Այս մասին հայտնում է ԿԳՄՍՆ պաշտոնական կայքը:
Այս տարվանից կամավոր ատեստավորմանը մասնակցելու հնարավորություն կունենան նաև պետական և համայնքային մարզադպրոցներում ուսումնամարզական գործընթաց իրականացնող ազատ և հունահռոմեական ոճի ըմբշամարտ, սամբո, ձյուդո մարզաձևերի մարզիչ-մանկավարժները:
ԿԳՄՍ նախարարի տեղակալ Կարեն Գիլոյանը շեշտել է մի շարք մարզաձևերում վերաորակավորված մասնագետների անհրաժեշտությունը և հույս հայտնել, որ կամավոր ատեստավորումը կնպաստի նաև այս բացի լրացմանը.
«Ավելորդ է ասել, թե որքան կարևոր է առողջ սերունդ կրթելու անհրաժեշտությունը: Ավելի լավ է կառուցենք շատ մարզադպրոցներ, քան հետագայում՝ հիվանդանոցներ, իսկ մարզադպրոցներն առանց մարզիչների չեն լինում: Հենակետային մարզաձևերում այսօր մարզիչների խնդիր չունենք, բայց շատ մարզաձևերում վերաորակավորված մասնագետների կարիք ունենք: Ատեստավորման գործընթացը շատ կարևոր է նաև մեզ համար՝ հասկանալու, թե ինչ իրավիճակ է տիրում: Մարզիչներն էլ հավելավճար կստանան և կբարելավեն իրենց կյանքի որակը»,- ասել է Կարեն Գիլոյանը:
Նրա խոսքով՝ կամավոր ատեստավորման արդյունքում մարզիչների աշխատավարձը գրեթե կրկնապատկվելու է. «Արդեն իսկ շատ զանգեր ենք ստանում ու գիտենք՝ մարզիչ-մանկավարժները շատ հետաքրքրված են: Արդեն իսկ հրապարակվել է ատեստավորման քննության թեստի լրացման ուղեցույցը, որում ներկայացված է թե՛ թեստի կառուցվածքը, թե՛ բովանդակությունը, թե՛ գրականության ցանկը, որից պետք է օգտվել՝ թեստերին պատրաստվելիս: Սպորտի ընդհանուր տեսություն, ընտրած մարզաձևի տեսություն և պրակտիկա, սպորտի մանկավարժություն, սպորտի հոգեբանություն և բժշկակենսաբանական հիմունքներ. սրանք այն կարևոր բաղադրիչներն են, որոնց մարզիչը պետք է տիրապետի: Ստացվել է այնպես, որ մարզիչները երբեմն ստվերում են մնում, հաջողության ժամանակ ավելի շատ մարզիկների անունն է հոլովվում, բայց մարզիչները հսկայական աշխատանք են իրականացնում, իսկ մարզչի աշխատանքն արդյունավետ է, եթե նա լավ, կիրթ մարզիչ է, տիրապետում է այս բոլոր մեխանիզմներին»,- ընդգծել է ԿԳՄՍ նախարարի տեղակալը՝ մարզիչներին հորդորելով մասնակցել կամավոր ատեստավորմանը:
Ատեստավորմանը մասնակցելու համար մանկավարժական աշխատողները հայտերը պետք է ներկայացնեն «Կրթության կառավարման տեղեկատվական համակարգում» էլեկտրոնային եղանակով /at.emis.am/՝ մինչև ապրիլի 9-ը՝ ժամը 18։00-ն:
Պետական և համայնքային մարզադպրոցներում ուսումնամարզական գործընթաց իրականացնող ազատ և հունահռոմեական ոճի ըմբշամարտ, սամբո, ձյուդո մարզաձևերի մարզիչ-մանկավարժների ատեստավորման գործընթացը կիրականացվի ապրիլի 29-ին:
ԿԳՄՍ նախարարի տեղակալը ներկայացրել է նաև ատեստավորման արդյունքներով նախատեսված հավելավճարները.
- 90-100 տոկոս արդյունք ցուցաբերելու դեպքում՝ նախատեսված է 138.300 դրամ լրավճար՝ մեկ դրույք ծանրաբեռնվածության համար. հարկերը և տուրքերը հանած՝ 100.000 դրամ,
- 80-89 տոկոս արդյունք ցուցաբերելու դեպքում՝ 111.500 դրամ լրավճար՝ մեկ դրույք ծանրաբեռնվածության համար. հարկերը և տուրքերը հանած՝ 80.000 դրամ,
- 70-79 տոկոս արդյունք ցուցաբերելու դեպքում՝ 80.600 դրամ լրավճար՝ մեկ դրույք ծանրաբեռնվածության համար. հարկերը և տուրքերը հանած՝ 60.000 դրամ,
- 79-ը տոկոսից ցածր արդյունք ցուցաբերած մասնագետները լրավճար ստանալու հնարավորություն չեն ունենա:
Ըստ վիճակագրության՝ սպորտի արտադպրոցական հաստատություններում շուրջ 2 հազար մանկավարժ է աշխատում: Ակնկալվում է, որ սպորտի բնագավառից ատեստավորմանը կմասնակցի շուրջ 200 մասնագետ:
