14-ամյա հայ թենիսիստ Միքայել Ավանեսյանը 2022թ. Թուրքիայի Անթալիա քաղաքում մասնակցել է Թենիսի Եվրոպայի զարգացման առաջնությանն ու հաղթող ճանաչվել: Կիսաեզրափակչում նա առավելության է հասել Թուրքիայի ներկայացուցչի նկատմամբ, իսկ եզրափակչում հաղթել չեռնոգորցի մարզիկին: Մրցաշարին եվրոպական 11 երկրի ներկայացուցիչներ են մասնակցել:
Հայաստանի թենիսի ֆեդերացիայի գործադիր տնօրեն Գևորգ Կարամանուկյանի խոսքով՝ Ավանեսյանի այս նվաճումը բացառիկ է հայկական թենիսի պատմության մեջ. «Միքայելն անցած տարվա դեկտեմբերին էլ էր մասնակցել այս մրցաշարին և զբաղեցրել երկրորդ հորիզոնականը, ինչը ևս աննախադեպ արդյունք էր: Այս տարի Միքայելն ինքն իրեն գերազանցեց:
Ինչ վերաբերում է Հայաստանում մարզվելուն և հաջողության հասնելուն, կարող եմ ասել՝ դա շատ իրատեսական է: Պարզապես այս մարզաձևը մեծ ներդրումներ է պահանջում»,- Կարամանուկյանի խոսքերն է փոխանցում Մենք Բարեգործական ՀԿ-ի ֆեյսբուքյան էջը:
Միքայել Ավանեսյանը հենց Մենք ՀԿ-ի շահառու է: Այս պահին Միքայելը Ֆրանսիայի Լիոն քաղաքի Allin Tennis Academy-ում մեկ տարվա մարզումներ է անցնում, ինչը մեծ քայլ է նրա՝ դեպի մեծ թենիս ճանապարհին։ ՄԵՆՔ բարեգործական ՀԿ-ն ստանձնել է ակադեմիայում պարապմունքների ֆինանսական ծախսերի աջակցությունը:
Նա 2019-2022թթ ITF Tennis Europe մրցաշարերում նվաճել է 19 ոսկե և 7 արծաթե մեդալ: Նվաճած ոսկե մեդալների քանակով Միքայելը զգալիորեն գերազանցում է Եվրոպայի լավագույն տասնյակի իր բոլոր հասակակիցներին: ITF Tennis Europe-ի մինչև 14 տարեկան տղաների վարկանիշային աղյուսակում 8-րդ է, իսկ սա հիանալի ցուցանիշ է։