Հայաստանի ազգային հավաքականի գլխավոր մարզիչ Խոակին Կապառոսը հրապարակեց այն ֆուտբոլիստների անունները, որոնք կնախապատրաստվեն առաջիկա ընկերական խաղերին: Հրավիրվածների թվում է նաև «Նորավանքի» դարպասապահ Հենրի Ավագյանը:
26-ամյա ֆուտբոլիստը Վայոց Ձորի մարզը ներկայացնող թիմի շարքերը համալրեց այս ձմռանը: Մինչ այդ նա պաշտպանում էր Չարենցավանի «Վանի» գույները: Ավագյանը հանդես է եկել տարբեր տարիքային հավաքականներում, Հայաստանի երիտասարդական հավաքականում անցկացրել է 11 հանդիպում: Նա առաջին անգամ ազգային հավաքական է հրավիրել 2018 թվականին՝ մասնակցելով Լիխտենշտեյնի դեմ խաղին։
ArmSport-ի հետ զրույցում Ավագյանը խոսել է «Նորավանք» տեղափոխության, հավաքականից հրավեր ստանալու, ինչպես նաև այլ թեմաների մասին։
-Հենրի, սպասո՞ւմ էիր հավաքականից հրավերի։
-Ճիշտն ասած, չէի սպասում և չէի էլ մտածում այդ ուղղությամբ: Միայն մտածում էի հնարավորինս շուտ մարզավիճակ ձեռք բերելու ու խաղերին լավ հանդես գալու մասին: Հավաքական հրավիրվելը ավելի մեծ պատասխանատվություն ու մոտիվացիա է:
-Ի՞նչպես իմացար հավաքականից հրավեր ստանալու մասին և ի՞նչ զգացողություններ ունեցար:
-ՀՖՖ ֆեյսբուքյան պաշտոնական էջից տեղեկացա հրավերի մասին: Զգացողություններն ուղղակի անբացատրելի են: Յուրաքանչյուր ֆուտբոլիստի երազանքն է կրել իր երկրի ազգային հավաքականի մարզաշապիկը: Հուսով եմ, որ կարդարացնեմ մարզչական շտաբի սպասելիքները:
-Ինչպե՞ս ստացվեց «Նորավանք» տեղափոխությունդ:
«Վանից» հետո ազատ ֆուտբոլիստ էի ու մոտ 6 ամիս թիմ չունեի: Ձմեռային դադարից առաջ մոտ մեկ ու կես ամիս մարզավիճակս պահպանելու համար մարզվում էի ԲԿՄԱ-ի հետ, ինչի համար շնորհակալ եմ գլխավոր մարզիչ Ռաֆայել Նազարյանին և ամբողջ ակումբին՝ իմ նկատմամբ ցույց տված վերաբերմունքի համար: Ինչ վերաբերում է «Նորավանք» տեղափոխությանս, հանդիպում ունեցա թիմի գլխավոր մարզիչ Վահե Գևորգյանի հետ ու համաձայնեցի տեղափոխվել «Նորավանք»: Ակումբում ամեն ինչ բարձր մակարդակի վրա է և ես երկար չմտածեցի որոշումն ընդունելու համար: Տեղափոխությանս վրա մեծ ազդեցություն ունեցավ նաև գլխավոր մարզչի գործոնը: Անում եմ ամեն ինչ, որ արդարացնեմ Վահե Գևորգյանի ու բոլորի սպասելիքները:
-Ընթացիկ մրցաշրջանի գարնանային հատվածից առաջ «Նորավանքը» զգալիորեն ուժեղացրել է կազմը: Ի՞նչ մթնոլորտ է թիմում:
-Թիմում մթնոլորտը լավ է, ու գիտակցում ենք, որ կարող ենք հաղթել ցանկացած խաղում: Հենց այդ մտքով էլ խաղադաշտ ենք դուրս գալիս ամեն խաղից առաջ: Կարող եմ ասել, որ քայլ առ քայլ գնում ենք առաջ, ու հաղթանակներն էլ շատ մոտ են:
-Թիմը պայքարում է նաև Գավաթի խաղարկությունում: Ի՞նչպես կգնահատեք ձեր թիմի շանսերը:
-Պատրաստ ենք «Արարատի» հետ կիսաեզրափակիչ հանդիպմանը: Արդեն նշեցի, որ թիմում հիանալի մթնոլորտ է և քայլ առ քայլ գնում ենք առաջ: Կարծում եմ՝ մեր շանսերն «Արարատի» հետ խաղում քիչ չեն:
-Ինչպե՞ս կգնահատես քո մարզավիճակը:
-Հիմա չեմ ասի, թե իմ լավագույն մարզավիճակում եմ, քանի որ ամեն դեպքում մոտ կես տարի բաց եմ թողել, բայց անում եմ ամեն ինչ, որպեսզի քրտնաջան աշխատանքի շնորհիվ հասնեմ լավագույն մարզավիճակիս:
-Եղե՞լ է դարպասապահ, որին փորձել ես նմանվել:
-Նմանվել չեմ փորձել ոչ մեկին, բայց եղել են դարպասապահներ, որոնց խաղը օրինակ է ծառայել: Կառանձնացնեմ Դավիդ Դե Խեային, Մարկ Անդրե Տեր Շտեգենին ու Յան Օբլակին:
-Հենրիխ Մխիթարյանն օրեր առաջ հայտարարեց հավաքականում կարիերան ավարտելու մասին: Ի՞նչ փոփոխություններ կլինեն հավաքականում Մխիթարյանի հեռանալուց հետո:
