ArmSport․am-ը նախորդ անգամ անդրադարձել էր Բելգիայի առաջնությանը, որն ավանդաբար հանդիսանում է Եվրոպայի գլխավոր ֆուտբոլային դարբնոցներից մեկը։ Այսօր կշարունակենք Ձեզ ծանոթացնել այդ առաջնության ամենահեռանկարային ներկայացուցիչների հետ։
Ջոն Լուկումի
🇨🇴 Կոլումբիա
«Գենկ»
21 տարեկան
«Գենկում» շատ են երիտասարդ ֆուտբոլիստները, սակայն Ջոնը համարվում է ամենահեռանկարայիններից մեկը։ 21-ամյա պաշտպանը ընդգրկված էր Կոլումբիայի հավաքականի կազմում Հարավային Ամերիկայի գավաթի վերջին խաղարկությունում, իսկ Պանամայի հետ խաղում նա իր առաջին հանդիպումն անցկացրեց հավաքականի մարզաշապիկով։ Այս մրցաշրջանում նա «Գենկի» կազմում բոլոր մրցաշարերում անցկացրել է 24 հանդիպում և 2 գոլ խփել։ Միգուցե ամռանը արդեն նրան տեսնենք թոփ-5 առաջնությունների որևէ թիմի կազմում։
Սամուել Բաստիեն
🇧🇪 Բելգիա
«Ստանդարտ»
23 տարեկան
«Ստանդարտի» կիսապաշտպանը բելգիական ֆուտբոլային գլխավոր դարբնոցի՝ «Անդերլեխտի» սան է։ Նա արդեն հասցրել է հանդես գալ Բելգիայի սահմաններից դուրս՝ 2016-18 թ․թ․ հանդես գալով իտալական «Կիևոյում» (33 հանդիպում, 2 գոլ Ա Սերիայի շրջանակներում)։ Սակայն նա վերադարձավ հայրենիք, իսկ այս մրցաշրջանում Բաստիենը ապացուցում է, որ բարձրակարգ ֆուտբոլիստ է՝ դառնալով «Ստանդարտի» առաջատարներից մեկը։
Ժերեմի Դոկու
🇧🇪 Բելգիա
«Անդերլեխտ»
17 տարեկան
Չնայած «Անդերլեխտի» համար այս մրցաշրջանը կարելի է անհաջող համարել, սակայն Բելգիայի ամենատիտղոսակիր ակումբի կազմում քիչ-քիչ իր տեղն է ամրապնդում 17-ամյա հարձակվող Դոկուն։ Նրա ծառայություններով ակտիվորեն հետաքրքվում են անգլիական գրանդները՝ մասնավորապես «Չելսին»։ Բելգիայի երիտասարդական հավաքականի առաջատարներից մեկն ըստ մասնագետների համարվում է ազգային հավաքականի ապագա աստղը և նրա հետ մեծ հույսեր են կապում հայրենիքում։
Ալբեր-Մբոյո Լոկոնգա Սամբի
🇧🇪 Բելգիա
«Անդերլեխտ»
20 տարեկան
Դոկուն միակ երիտասարդ տաղանդը չէ «Անդերլեխտի» կազմում։ 20-ամյա Սամբին ևս համարվում է բելգիական ֆուտբոլի ամենահեռանկարային ֆուտբոլիստներից մեկը, եթե, իհարկե, չորոշի հանդես գալ իր պատմական հայրենիքի հավաքականում (Կոնգոյի Դեմոկրատական Հանրապետությունը)։ Նրա ավագ եղբայրը՝ Փոլ-Ժոզե Մպոկուն, ով, ի դեպ, «Տոտենհեմի» սան է, ինչպես Սամբին, ժամանակին ներկայացնում էր Բելգիայի երիտասարդական հավաքականը, իսկ հետո նախընտրեց ներկայացնել միջազգային ասպարեզում պատմական հայրենիքը։ Սամբին՝ մեկ այլ 20-ամյա կիսապաշտպան Ֆրենսիս Ամուզուի և արդեն Ձեզ ծանոթ Դոկուի հետ միասին ներկայումս հանդիսանում են ինչպես «Անդերլեխտի», այնպես էլ Բելգիայի հավաքականի ապագա աստղերը․․․
Հանս Վանակեն
🇧🇪 Բելգիա
«Բրյուգե»
27 տարեկան
Մեր այսօրվա հերոսներից ամենափորձառուն։ Հանսը վերջերս պարբերաբար հրավիրվում է Բելգիայի հավաքական, իսկ առաջնության առաջատար «Բրյուգեում» համարվում է թիմի առաջատարը․ բոլոր մրցաշարերում ակումբի կազմում այս մրցաշրջանում նա արդեն անցկացրել է 37 հանդիպում և աչքի ընկել 15 գոլով։ Վանակենը, ով ի դեպ, ՊՍՎ-ի սան է, 2017/18 մրցաշրջանում ճանաչվել է Բելգիայի առաջնության տարվա լավագույն ֆուտբոլիստ։ 27-ամյա բարձրահասակ հարձակվողական ոճի կիսապաշտպանը, ով երբեմն խաղում է նաև կենտրոնական հարձակվողի դիրքում, արդեն պատրաստ է տեղափոխվել եվրոպական թոփ առաջնություններ և միգուցե ամռանը մենք կտեսնենք նրան որևէ թոփ ակումբում։
Վար Բաբայան
Շարքի նախորդ մասերը
Բելգիան շարունակում է մնալ ապագա աստղերի դարբնոց (Մաս 1)
Սամուրայների նոր սերունդը Եվրոպայում
Բրազիլիայի առաջնության ամենահեռանկարային ֆուտբոլիստները (Մաս 2)
Բրազիլիայի առաջնության ամենահեռանկարային ֆուտբոլիստները (Մաս 1)
MLS-ի 7 ֆուտբոլիստներ, ովքեր կարող են փայլել Հին աշխարհում
