Գերմանահայ պրոֆեսիոնալ բռնցքամարտիկ Լեոն Հարտը (Լևոն Հակոբյան) պարտություն կրեց WBO վարկածով Եվրոպայի չեմպիոնական գոտու համար մենամարտում:
33–ամյա բռնցքամարտիկը լավ նախապատրաստական փուլ էր անցել և անակնկալ պարտություն կրեց միավորների տարբերությամբ։ ArmSport–ի հետ զրույցում գերմանահայ բռնցքամարտիկը խոսեց վերջին մենամարտի, պարտության պատճառների և առաջիկա պլանների մասին։
«Դեռ պետք է վերլուծենք մենամարտը, քանի որ ամեն ինչ կար իմ հաղթանակի համար։ Ես հոյակապ մարզավիճակում էի, լավ նախապատրաստական փուլ էինք անցել, բայց այն ինչին ես ընդունակ էի, չկարողացա ռինգում կատարել։ Այդ պատասխանը մինչև հիմա չեմ գտնում, թե ինչու։ Տպավորություն էր, որ ես գիպնոզացած էի։ Շատ ցավոտ էր, քանի որ պարտվեցի միավորների չնչին տարբերությամբ»,–ասում է Հարտը։
Խոսելով այս մենամարտի կարևոության մասին՝ հայազգի բռնցքամարտիկն ասում է․ «Ամեն մենամարտ շատ կարևոր է, ուղղակի այս պարագայում կարևորն այն էր, որ հաղթանակն ինձ համար ճանապարհ կբացեր պայքարելու աշխարհի չեմպիոնության համար»,–նշում է Հարտը։
Որոշ ժամանակ հանգստից հետո բռնցքամարտիկի թիմը որոշում կկայացնի ռեվանշ մենամարտ անցկացնելու վերաբերյալ։
«Պայմանագրի մեջ կետ ունենք, ըստ որի կարող ենք ռեվանշ մենամարտ անցկացնել։ Մոտ ժամանակներս թիմով կհասկանանք ռեվանշ մենամարտ անցկացնելու գաղափարը։ Առաջիկայում կհանգստանամ, քանի որ վերջին 3 ամիսը ծանր աշխատանք եմ կատարել՝ նախապատրաստվելով այս մենամարտին»,–խոսելով առաջիկա անելիքների մասին նշում է Լեոն Հարտը։
Գերմանահայ բռնցքամարտիկը հաջորդ մենամարտը կանցկացնի մարտ ամսից ոչ շուտ։
Երվանդ ՀԱԿՈԲՅԱՆ