Աշխարհի առաջնության ընտրական փուլում բավականին լարված ընթացք է ստացել ԿՈՆԿԱԿԱՖ-ի գոտին, որտեղ համառ մրցապայքարի մեջ են ԱՄՆ-ի, Մեքսիկայի, Կանադայի և Պանամայի հավաքականները։ ԱՄՆ-ն և Մեքսիկան 14-ական միավորով գլխավորում են մրցաշարային աղյուսակը՝ մեկ միավոր ավելի ունենալով Կանադայից։
ԱՄՆ-ի հավաքականի անդամներից համաշխարհային ֆուտբոլի էլիտայում են հայտնվել և արդեն իսկ իրենց մասին լսել տվել այնպիսի երիտասարդներ, ինչպիսիք են Սերժինյո Դեստը, Ուեսթոն Մաքքենին, Քրիստիան Պուլիշիչը, Թիմոթի Վեան և Ջիովաննի Ռեյնան։ Վերջին տարիներին եվրոպական թոփ լիգաներում և ակումբներում ամերիկացի տաղանդավոր ֆուտբոլիստների պակաս չկա։ Եվ այս անունների շարքին շուտով կարող է դասվել ևս մեկը՝ ի դեմս 18-ամյա տաղանդավոր հարձակվող Պեպի Ռիկարդոյի։ Բնականաբար, Ռիկարդոն դեռևս չունի այն անունը, որն ունեն հավաքականում նրա խաղընկերները, բայց, շարունակելով ներկայիս հաղորդած տեմպը, սարերի հետևում չի լինի այն օրը, երբ վերջինս կհամարվի համաշխարհային ֆուտբոլի ամենապահանջված ֆուտբոլիստներից մեկը։
Հաջորդ հանդիպումն ամերիկացիներն անցկացնելու են նոյեմբերի 17-ին՝ հյուրընկալվելով Ճամայկայի ընտրանուն։ Սա ամերիկացիների վերջին հանդիպումն է 2021 թվականին և թոփ ակումբների սկաուտների համար վերջին շանսը՝ մեր այսօրվա հերոսին գործի մեջ տեսնելու և ձմեռային տրանսֆերային պատուհանի ընթացքում վերջինիս առաջարկ կատարելու։
Անցած ճանապարհը․ MLS-ի պատմության մեջ հեթ-տրիկի հեղինակ դարձած ամենաերիտասարդ ֆուտբոլիստը
Ռիկարդոն ծնվել է 2003 թվականի հունվարի 9-ին Տեխաս նահանգի Էլ-Պասո քաղաքում։ Ֆուտբոլային կրթությունը հարձակվողը ստացել է հարազատ «Դալլասի» մարզադպրոցում։ 2018 թվականին 15 տարեկան հասակում Պեպին միանում է ակումբի նոր ստեղծված «դուստր» թիմին և մեկնարկային խաղում դառնում է հեթ-տրիկի հեղինակ։ Ակումբի «դուստր» թիմի կազմում ցուցադրած արդյունավետ և հասուն ֆուտբոլը ստիպում է «Դալլասի» մարզիչներին տաղանդավոր պատանուն ինտեգրել գլխավոր թիմի կազմում։ 2019 թվականի հունիսի 11-ին «Օկլոհամա Սիթիի» դեմ խաղում տեղի է ունենում MLS-ում 16-ամյա Պեպիի պաշտոնական նորամուտը։ Ուղիղ 10 օր անց Ռիկարդոն «Դալլասի» հետ կնքում է առաջին պրոֆեսիոնալ պայմանագիրը։ Աստիճանաբար ադապտացվելով գլխավոր թիմի խաղին՝ հարձակվողը 2020 թվականի մարտի 7-ին իր առաջին գոլն է խփում կանոնավոր առաջնությունում՝ գրավելով «Մոնրեալ Իմպակտի» դարպասը։ Արդեն նույն թվականի հունիսի 24-ին գրանցում է ցուցանիշ, որն անգերազանցելի է մինչ օրս։ Այդ օրը Պեպին 18 տարեկան 196 օրական հասակում երեք գոլ է ուղարկում «ԼԱ Գալաքսիի» դարպասը և դառնում MLS-ի պատմության ամենաերիտասարդ ֆուտբոլիստը, որը դարձել է հեթ-տրիկի հեղինակ։
Փառահեղ նորամուտ ազգային հավաքականում
Պեպի Ռիկարդոն, ով ունի նաև մեքսիկական արմատներ, ԱՄՆ-ի ազգային հավաքականում նորամուտը նշեց սույն թվականի սեպտեմբերի 9-ին՝ Աշխարհի առաջնության որակավորման փուլի շրջանակում ամբողջական հանդիպում անցկացնելով Հոնդուրասի դեմ խաղում։ Այդ օրը Միացյալ Նահանգների ընտրանին մրցակցին հաղթեց 4-1 հաշվով, իսկ մեր հերոսը դարձավ գոլի և արդյունավետ փոխանցման հեղինակ։ Մինչ օրս 18-ամյա հարձակվողը ԱՄՆ-ի հավաքականում անցկացրել է չորս հանդիպում և դարձել երեք գոլի հեղինակ։ Ռիկարդոյի ցուցադրած խաղն այնքան հասուն է, որ հավաքականի մարզիչները վերջինիս մինչև 17 տարեկանների հավաքականներից տեղափոխեցին միանգամից ազգային թիմ, այն դեպքում, երբ Պեպին կարող էր իրեն դրսևորել նախ երիտասարդական հավաքականում, ապա նոր հրավեր ստանալ երկրի գլխավոր թիմի մարզիչներից, սակայն դրա կարիքը չեղավ՝ շնորհիվ տաղանդավոր ֆուտբոլիստի ցուցադրած գերհասուն խաղի։
Ընթացիկ մրցաշրջանի ելույթները «Դալլասի» կազմում
MLS-ի ընթացիկ մրցաշրջանի կանոնավոր առաջնությունն ավարտվեց օրերս, և հայտնի դարձան փլեյ-օֆֆի մասնակից թիմերը։ «Դալլասը» 34 հանդիպումների արդյունքում գրավեց Արևմտյան կոնֆերենցիայի մրցաշարային աղյուսակի 11-րդ հորիզոնականը և զրկվեց փլեյ-օֆֆի ուղեգրից, սակայն դրանից չեն «խամրում» Ռիկարդոյի գրանցած ցուցանիշներն ու ցուցադրած խաղը։ Հարձակվողը մասնակցեց 31 հանդիպման՝ դառնալով 13 գոլի և երեք գոլային փոխանցման հեղինակ։
Դեռևս անցած ամռանը Պեպիի տրանսֆերային արժեքը գնահատվում էր 2,5 միլիոն եվրո, իսկ այժմ այն կազմում է ութ միլիոն եվրո, ինչը ևս մեկ վառ ապացույց է, թե ֆուտբոլիստն ինչպիսի շարունակական աճ է գրանցել վերջին ամիսների ընթացքում։
Ո՞ր թոփ ակումբը կլինի այն հաջողակը, որի կազմում կտեսնենք տաղանդավոր ֆուտբոլիստին
Ռիկարդոյի պայմանագրի ժամկետը «Դալլասի» հետ լրանում է 2026 թվականին, բայց կասկածից վեր է, որ շատ շուտով Պեպի Ռիկարդո անունն ասոցացնելու ենք եվրոպական որևէ առաջատար լիգայի հետ։
«Թե՛ իմ, թե՛ ընտանիքիս անդամների համար կարևոր է, որ ես տեղափոխվեմ եվրոպական թոփ լիգա։ Կարծում եմ, որ շուտով կլինի դրա լավագույն ժամանակը»,- այս մասին ֆուտբոլիստն ասել է մի քանի ամիս առաջ։
Անցած ամռանը իտալական «Ֆիորենտինան» և «Բոլոնիան» ցանկացել են ձեռք բերել Պեպիին, սակայն գործարքը վերջնական հաջողություն չի գրանցել։ Վերջին ամիսներին ֆուտբոլիստի անունը տարբեր լրատվականներ կապել են այս կամ այն գրանդ ակումբի հետ։ Այդ ամենը տրամաբանական է այնքանով, որ յուրաքանչյուր ակումբի ղեկավարություն մեծ ցանկություն կունենա նման հեռանկարային ֆուտբոլիստին տեսնել իր թիմի կազմում։ Սակայն, միաժամանակ պարզ և հասկանալի է, որ Ռիկարդոյին տեսնելու ենք այդ թիմերից միայն մեկում․․․
«Բավարիա», Դորտմունդի «Բորուսիա», «Յուվենտուս», «Միլան», «Վոլֆսբուրգ», «Մանչեսթեր Յունայթեդ»․ սրանք այն ակումբներն են, որոնց հետ Ռիկարդոյի անունը կապել են տարբեր լրատվականներ։ Իսկ ի՞նչ տեսակետ ունի անձամբ ֆուտբոլիստը՝ կապված իր ապագա ակումբի հետ․
«Ես միշտ երազել եմ հանդես գալ Մադրիդի «Ռեալում» կամ Լոնդոնի «Չելսիում»։ Ես դեռևս բավականին երիտասարդ եմ և շատ բան ունեմ սովորելու, իսկ այդ առումով կարիերայի շարունակության հրաշալի տարբերակ կարող է լինել հոլանդական Էրեդիվիզիան, որտեղ հանդես են գալիս բազմաթիվ երիտասարդ ֆուտբոլիստներ։ Այս տեսանկյունից Նիդեռլանդների առաջնությունն իդեալական տարբերակ է»,- սրանք Պեպիի վերջին մտքերն են՝ կապված իր կարիերայի շարունակության հետ։
Առաջիկա տրանսֆերային պատուհանը հրաշալի հնարավորություն է ընձեռելու բոլոր թոփ ակումբներին, որոնք ցանկանում են ամերիկացուն տեսնել իրենց կազմում, իսկ այն, որ Ռիկարդոյի՝ Եվրոպա տեղափոխվելը «սարերի հետևում չէ», ներկա պահին 99%-անոց փաստ է։
Դե ինչ, սպասենք 2021 թվականին 18-ամյա հարձակվողի վերջին ելույթին, քանի որ բացառված չէ, որ հունվարից հետո Ռիկարդո Պեպի անունը կտեսնենք որևէ գրանդ ակումբի հայտացուցակում։
Սուրեն Մելիքսեթյան
