Ավստրիայի Գրաց քաղաքում կայացած գեղասահքի Եվրոպայի առաջնությունում Հայաստանի ներկայացուցիչ Սլավիկ Հայրապետյանը, ինչպես հայտնի է, կարճ և ազատ ծրագրերի հանրագումարով 26 երկրի 35 մասնակցի պայքարում գրավել է 18-րդ հորիզոնականը: 23-ամյա գեղասահորդը ArmSport-ի հետ զրույցում նշում է, որ գոհ է իր ելույթներից, չնայած ցույց է տվել հնարավորությունների 80 տոկոսը.
«Կարողացա ցույց տալ իմ հնարավորությունների 80 տոկոսն այս մրցաշարում: Գոհ եմ ելույթներիցս: Իսկ գնահատականներից գոհ չեմ: Շատ վատ դատեցին, կարճ ծրագրում սխալներ էին դրել իմ կատարած վարժությունների մեջ: Գոհ եմ իմ մարզավիճակից: Շարունակելու եմ աշխատել ու ավելի ուժեղ պատրաստվել»,- ասում է Սլավիկ Հայրապետյանը:
Ռուսական մամուլում շատ էին հրապարակումներն այն մասին, որ այս տարի Եվրոպայի առաջնությունը կազմակերպված չէր ըստ արժանվույն: Սլավիկ Հայրապետյանը հաստատում է այս պնդումը՝ այդուհանդերձ ընդգծում, որ արդարացումներ փնտրել պետք չէ.
«Բոլորը միևնույն պայմաններում են: Վատ սահորդին միշտ մի բան խանգարում է: Բայց Եվրոպայի առաջնությունը չպետք է այս պայմաններում անցկացվի՝ սովորական միջազգային մրցաշարերի մակարդակին: Ամեն դեպքում ինձ համար ամեն ինչ նորմալ էր, պետք է հարմարվես այն ամենին, ինչ կա»,- ասում է Սլավիկ Հայրապետյանը:
Ինչպես հայտնի է, Սլավիկ Հայրապետյանը կարճ ծրագրում վաստակել էր 66,89 միավոր ու 20-րդ արդյունքով մտել էր եզրափակիչ: 24 ուժեղագույնների պայքարում կամավոր ծրագրում նա ստացել էր 127,72 միավոր ու զբաղեցրել 18-րդ հորիզոնականը: Սա նրան հնարավորություն էր ընձեռել երկու մրցաձևերի ընդհանուր գումարով / 194,61միավոր /, 26 երկրների 35 մասնակիցների պայքարում գրավել 18-րդ տեղը:
Հիշեցնենք՝ երիտասարդ գեղասահորդը մեզ հետ զրույցում ավելի վաղ նշել էր, որ ԵԱ-ից հետո երկու միջազգային մրցաշարի կմասնակցի` նախ Տալլինում, ապա Լյուքսեմբուրգում, ինչից հետո` մարտի 16-ին, Կանադայում իր ուժերը կչափի արդեն աշխարհի առաջնությունում:
