Էստոնիայի մայրաքաղաք Տալինում այսօր՝ հունվարի 12-ին, մեկնարկում է գեղասահքի Եվրոպայի առաջնությունը: Հայաստանն, ինչպես ավելի վաղ հայտնել էինք, ներկայացնելու են մենասահորդ Սլավիկ Հայրապետյանը և Թինա Կարապետյան-Սիմոն Պրոուլքս Սենեկալ պարային զույգը:
Սլավիկ Հայրապետյանն ArmSport-ի հետ զրույցում նշել է՝ ինքը Եվրոպայի առաջնությանը լավ է պատրաստվել, մնացածը ցույց կտան մրցումները:
«Հատուկ ԵԱ-ին պատրաստվելու համար ժամանեցի Երևան, որպեսզի նախապատրաստությունը տանն անցկացնեմ: Պետք է լավ, մաքուր սահել և տեսնել՝ դատավորներն ինչ կորոշեն: Մեր մարզաձևում սխալվել կամ թերանալ չի կարելի»,- ասել է Սլավիկ Հայրապետյանը:
Ինչ վերաբերում է Պեկինում կայանալիք ձմեռային Օլիմպիական խաղերին, Սլավիկ Հայրապետյանի խոսքով իրենք ամեն օր սպասում են նորության.
«Մինչև վերջին օրը լինելու ենք պատրաստ»,- ասում է երիտասարդ գեղասահորդը:
Հիշեցնենք՝ ձմեռային օլիմպիական խաղերը կմեկնարկեն փետրվարի 4-ին Չինաստանի մայրաքաղաքում: ՕԽ-ին իրենց մասնակցությունը դեռևս ապահովել են միայն գեղասահորդներ Թինա Կարապետյանը և Սիմոն Պրոուլքս Սենեկալը: Ի դեմս նրանց՝ Հայաստաանը 16 տարի անց օլիմպիական խաղերին կմասնակցի նաև գեղասահքում:
Ինչ վերաբերում է գեղասահքի Եվրոպայի առաջնությանը, ապա նշենք՝ տղամարդկանց մենասահքի կարճ ծրագրով գեղասահորդները հանդես կգան այսօր՝ հունվարի 12-ին: Մեկնարկը Երևանի ժամանակով ժամը 13:50-ին է, իսկ Սլավիկ Հայրապետյանը ելույթ կունենա 14-րդ համարի ներքո: Այսօր երեկոյան կարճ ծրագրով հանդես կգան նաև պարային զույգերը: Մեկնարկը ժամը 20:45-ին է:
Ստուգատեսին 123 մարզիկ-մարզուհի է մասնակցում՝ 71 մենասահորդ, 30 պարային և 22 սպորտային զույգ:
