Հայաստանի ֆուտբոլի ֆեդերացիայի տարածած պաշտոնական հաղորդագրությունից հետո, որտեղ նշվում էր, թե դատարանն առանց քննության է թողել «Նոա» ՖԱ-ի և Աննա Օհանյանի հայցադիմումները՝ վերականգնելով 15 լեգեոների սահմանափակումը, «Նոա» ֆուտբոլային ակումբի մամուլի ծառայությունը կապ է հաստատել Armsport.am-ի խմբագրության հետ։
Ակումբը տրամադրել է Աննա Օհանյանի փաստաբան Արփինե Հովհաննիսյանի պարզաբանում-հերքումը, որում ընդգծվում է, որ դատարանի որոշումը դեռևս օրինական ուժի մեջ չի մտել, ենթակա է բողոքարկման, իսկ լեգեոներների սահմանափակումն այս պահին շարունակում է մնալ կասեցված։
Ստորև ներկայացնում ենք Արփինե Հովհաննիսյանի հայտարարությունն ամբողջությամբ․
«Եթե Հայաստանի ֆուտբոլի ֆեդերացիան նույն հետևողականությունը ցուցաբերեր իր իրավասության շրջանակներում գտնվող բոլոր հարցերում, հավանաբար այսօր հայկական ֆուտբոլում մի փոքր այլ իրավիճակ կունենայինք։
Նախ՝ դատարանն ընդհանրապես չի անդրադարձել 15 լեգեոներների սահմանափակման իրավաչափությանը։ Հայցը թողնվել է առանց քննության՝ այն պատճառաբանությամբ, որ վեճը ենթակա է արբիտրաժային քննության։ Այդ որոշումը ենթակա է բողոքարկման, ինչը մենք պատրաստվում ենք անել։ Այսինքն որոշումը դեռևս օրինական ուժի մեջ չի մտել, ուստի վերջնական տոնով սխալ պնդումները նվազագույնը ոչ պրոֆեսիոնալ են։
Ակնկալում եմ, որ ՀՖՖ-ն նույն փութաջանությամբ հանրությանը կտեղեկացնի նաև դատական գործընթացի մյուս՝ ոչ պակաս կարևոր արդյունքի մասին։
Դատարանը մերժել է ՀՖՖ-ի՝ հայցի ապահովման միջոցը վերացնելու միջնորդությունը՝ անհիմն համարելով ներկայացված փաստարկները։
Այսինքն՝ հայցի ապահովման միջոցը շարունակում է գործել, և 15 լեգեոներների սահմանափակումը շարունակում է մնալ կասեցված։
Իհարկե, ես ՀՖՖ-ի օրինակին չեմ հետևի և չեմ շրջանցի այն փաստը, որ իրենք վերաքննիչ բողոք են ներկայացրել, որը դեռ պետք է քննվի։ Բայց նաև չեմ կարող չնշել, որ այդ բողոքում, որևէ լուրջ և իրավաբանորեն հիմնավոր փաստարկ չկա, որը կարող է արդարացնել հայցի ապահովման միջոցի վերացումը։Ուղղակի չկա ու վերջ:
Ավելին՝ դատական նիստի ընթացքում ՀՖՖ-ի ներկայացուցչի ներկայացրած դիրքորոշումներն ավելի ամրապնդեցին մեր համոզմունքը, որ իրական նպատակը ոչ թե հայկական ֆուտբոլի զարգացումն է, որքան «Նոա» ֆուտբոլային ակումբի տնտեսական և մրցակցային հնարավորությունների սահմանափակումը։ Այդ մասին մարդիկ բաց տեքստով են ասել:
Իսկ սա արդեն ոչ միայն սպորտային քաղաքականության, այլև մրցակցության իրավունքի լրջագույն խնդիր է՝ հակամրցակցային համաձայնության հնարավոր հատկանիշներով։ Հետևությունները դուք արեք»:
Ավելի վաղ Հայաստանի ֆուտբոլի ֆեդերացիան հանդես էր եկել պաշտոնական հաղորդագրությամբ՝ տեղեկացնելով, որ Երևանի առաջին ատյանի ընդհանուր իրավասության քաղաքացիական դատարանը հոկտեմբերի 22-ի որոշումներով առանց քննության է թողել ՀՖՖ Գործկոմի անդամ Աննա Օհանյանի և «Նոա» ՖԱ-ի հայցադիմումները, ինչպես նաև վերացրել է 2026/27 մրցաշրջանի կանոնակարգի 20.03-րդ կետի (15 լեգեոների սահմանափակման) կիրառման արգելքը։ ՀՖՖ-ն հայտնել էր, որ կողմերի միջև առկա է արբիտրաժային վերապահում, ըստ որի՝ վեճերը ենթակա են քննության Լոզանի Մարզական արբիտրաժային դատարանում (CAS), իսկ դատարանի որոշումներն ուժի մեջ են մտնում հրապարակման պահից յոթնօրյա ժամկետում։
