Կոնֆերենցիաների լիգայի խմբային փուլում վաղը՝ հոկտեմբերի 21-ին, «Ալաշկերտը» կընդունի ավստրիական ԼԱՍԿ-ին:
Խաղից առաջ կայացած ասուլիսին ԼԱՍկ-ի գլխավոր մարզիչ Անդրեաս Վյելանդն ասաց հետևյալը.
ԱԼԱՇԿԵՐՏԻ ՄԱՍԻՆ
Կարծում եմ՝ «Ալաշկերտը» լավ թիմ է, որը եվրագավաթներում լավ արդյունքներ է գրանցել։ Առաջնությունում իրավիճակը նրանց համար այնքան էլ լավ չէ, բայց այդ դիրքը դեռ իրավիճակը լիովին չի արտացոլում նաև նրա համար, որ թիմը երկու խաղ պակաս է անցկացրել։
Գիտենք թիմի ուժեղ կողմերը, բայց նաև մեր թիմի ուժեղ կողմերը գիտենք ու փորձելու ենք վաղը դրական արդյունքի հասնել։
ԼԱՍԿ-ի ԿԱԶՄԻ ՄԱՍԻՆ
Որակզրկում ունեցող խաղացողներ չունենք, ի ուրախություն մեզ։ Վնասվածքների հետ կապված որոշ խնդիրներ ունենք, որոշ խաղացողներ կբացակայեն, բայց եթե կարողանանք վստահ խաղ ցուցադրել, ինչը սովորաբար անում ենք, կկարողանանք դրական արդյունքի հասնել։
ԱԼԱՇԿԵՐՏԻ ԽԱՂԱՑՈՂՆԵՐԻ ՄԱՍԻՆ
Անկեղծ ասած, կառանձնացնեի «Ալաշկերտի» բոլոր խաղացողներին, բայց հիմա նշեմ Էմբալոյին, որն արդեն մի քանի կարևոր խաղում գոլեր է խփել, Սանտոսին, ինչպես նաև թիմի ավագին։
ԱԼԱՇԿԵՐՏԻ ՆՈՐ ՄԱՐԶՉԻ ՄԱՍԻՆ
Տեղյակ եմ, որ մարզչական փոփոխություն է եղել թիմում։ Նրա գալով՝ թիմը ավելի ստաբիլ խաղ է ցուցադրում, խաղի կազմակերպվածությունն ավելի լավ է։
ՎԱՂՎԱ ԽԱՂԻ ՄԱՍԻՆ
Եթե նայենք մրցաշարային աղյուսակին, մենք վաղվա խաղի ֆավորիտն ենք, բայց ֆուտբոլն այնպիսի խաղ է, որ ամեն ինչ որոշվում է խաղադաշտում։ Եթե լավ խաղ ցուցադրենք, կկարողանանք դրական արդյունքի հույս ունենալ։