Հայաստանի Մ-21 հավաքականը շարունակում է պատրաստվել Սերբիայի և Հյուսիային Մակեդոնիայի դեմ հանդիպումներին:
ՀՖՖ ТV-ն ներկա է եղել մեր ընտրանու հերթական մարզմանը և զրուցել պաշտպան Արսեն Գալստյանի հետ.
«Ամեն ինչ անելու ենք, որպեսզի լավ ներկայանանք առաջիկա խաղերին: Վերլուծել ենք արդեն Սերբիայի հավաքականի խաղը՝ թե՛ պաշտպանությունում, թե ՛ հարձակման գծում: Ունենք նորեկներ, որոնք արդեն լրիվ ընտելացել են թիմին: Կարծում եմ՝ նրանք նույնպես կարող են լավ դեր ունենալ, ու ամեն ինչ կանեն, որպեսզի օգնեն թիմին ու կարողանանք հաղթել Սերբիային և Հյուսիսային Մակեդոնիային»,- ասել է Գալստյանն ու խոսել նաև Ուկրաինայի դեմ խաղում խփած իր գեղեցիկ գոլը.
«Հավաքականի կազմում գոլ խփելը շատ մեծ պատասխանատվություն է: Շատ ուրախացա: Հուսով եմ՝ Սերբիայի դեմ խաղում ևս կկարողանամ գոլ խփել:
Առաջիկա խաղերին բոլորին սպասելու ենք մարզադաշտում»,- ասել է մեր երիտասարդական հավաքականի պաշտպանը:
Հոկտեմբերի 7-ին Հայաստանի Մ-21 հավաքականը ՈՒԵՖԱ ԵՎՐՈ Մ-21 որակավորման փուլի H խմբում Երևանում կմրցի Սերբիայի հասակակիցների հետ, իսկ հոկտեմբերի 12-ին՝ կհյուրընկալի Հյուսիսային Մակեդոնիայի մինչև 21 տարեկանների հավաքականին: