Բոսնիա և Հերցոգովինայում ընթացող բռնցքամարտի կրտսեր տարիքի պատանիների Եվրոպայի առաջնությունում Հայաստանն ապահովել է առնվազն 6 բրոնզե մեդալ, հայտնում է Հայաստանի Բռնցքամարտի ֆեդերացիայի մամուլի ծառայությունը։
1/4 եզրափակիչում իրենց մրցակիցներին հաղթել ու կիսաեզրափակիչ են դուրս եկել 48 կգ քաշային Վանաձորի մարզադպրոցի սան Վազգեն Քարհանյանը, 57 կգ քաշային «Սևան» մարզական կազմակերպությունը ներկայացնող Անդրանիկ Մարտիրոսյանը և Շիրակի մարզը ներկայացնող 70 կգ քաշային Լյովա Կիրակոսյանը։ Ընդ որում 48 կգ քաշային Վազգեն Քարհանյանը հունգարացի Ռիչարդ Հորվաթի հետ մենամարտում մրցակցին 3 անգամ նոկդաունի է ենթարկել և հաղթել ժամանակից շուտ։
Մեր մարզիկներից կիսաեզրափակիչում են նաև 75 կգ քաշային Դավիթ Նիկողոսյանը, 38 կգ քաշային Վիկտորիա Զաքարյանը և 42 կգ քաշային Հեղինե Պետրոսյանը։
Այսօր և վաղը ևս 10 բռնցքամարտիկ կպայքարեն կիսաեզրափակիչի ուղեգրի և առնվազն բրոնզե մեդալ ապահովելու համար։
Նշենք, որ մրցավայր մեկնած Հայաստանը ներկայացնող բոլոր բռնցքամարտիկները դուրս են եկել 1/4 եզրափակիչ, ինչը բացառիկ երևույթ է հայկական բռնցքամարտի պատության մեջ։ Փաստացի մրցավայր մեկնած մեր 17 մարզիկներից 16-ը շարունակում են պայքարը մեդալների համար։ Մրցավայր է մեկնել նաև բռնցքամարտի Հայաստանի ֆեդերացիայի նախագահ Հովհաննես Հովսեփյանը։
