Պորտուգալիայի հավաքականի հարձակվող Կրիշտիանու Ռոնալդուի աղմկահարույց քայլը Եվրո-2020-ի նախախաղային մամուլի ասուլիսի ընթացքում բոլորն են հիշում։ Ռոնալդուն, որն ասուլիսի ընթացքում ցուցադրաբար հեռացրեց դիմացը դրված Coca Cola-ի շշերը և փոխարենը սովորական ջրի շիշը վերցրեց, պարզվում է՝ կտրականապես դեմ է շաքարին ու քաղցր հյութերին։
Ռոնալդուն խիստ դիետա է պահում՝ հրաժարվելով ցանկացած տեսակի քաղցրից
Դիետայի շնորհիվ Ռոնալդուն պահում է ֆուտբոլային տոնուսն, իսկ կախված իր առջև դրված խնդիրներից, դիետան փոփոխվում է։ Մկանային զանգված ապահովելու կամ քաշ գցելու համար Ռոնալդուի թիմը տարատեսակ մեթոդներ է ընտրում՝ մարզումներ, անհատական աշխատանք մարզասրահում, հատուկ սննդակարգ և հանգստի ռեժիմ։ Կրիշտիանուն ուշադրություն է դարձնում անգամ ամենափոքր թվացող մանրուքներին․
«Նա պերֆեկցիոնիստ է»,- ասել էր Զինեդին Զիդանը, երբ դեռ աշխատում էր Անչելոտիի մարզչական շտաբում։
«Առողջ դիետան ֆուտբոլի համար հիմնարար նշանակություն ունի։ Եթե դու ճիշտ չես սնվում, չես կարող 100 տոկոսով պատրաստ լինել»,- ասել է Ռոնալդուն։
Քաղցրը ճիշտ մթերք չէ Ռոնալդուի համար, հենց այս պատճառով նրա սննդակարգում ի սպառ բացակայում են շաքարն ու գազավորված ըմպելիքները․
«Կարևորը ինքդ քո մարմնին հոգ տանելն է, մարզվելն ու ճիշտ սնվելը»,- մի անգամ ասել է Ռոնալդուն։
2018-ին Ռոնալդուն պատմել է, որ իր բիոլոգիական տարիքը 23-ն է, նա կշարունակի ամենաբարձր մակարդակում ֆուտբոլ խաղալ մինչև 40 տարեկանը։
Իսկ ի՞նչ է նախատեսված Ռոնալդուի գովազդային պայմանագրերով
Պորտուգալացին երբեք չի էլ գովազում քաղցր ըմպելիքներ։ Տարբեր տարիներին նա գովազդել է շամպուն, ձեռքի ժամացույց, կա նաև Nike-ի հետ աստղաբաշխական պայմանագիրն ու հագուստի սեփական բրենդը։
Ռոնալդուն ակտիվորեն գովազդում է սպորտային սնունդն ու պայմանագրեր չի կնքում, օրինակ գազավորված ըմպելիքներ արտադրող ընկերությունների հետ։ Չնայած 8 տարի առաջ ֆուտբոլիստը մասնակցել է KFC-ի պրոմոակցիային և հավի բդիկներ է կերել տեսախցիկների առջև։
Մի անգամ Pepsi-ն օգտագործել է Ռոնալդուի կերպարն ու ստիպված է եղել ներողություն խնդրել
ԱԱ-2014-ի Շվեդիա-Պորտուգալիա խաղից առաջ PepsiCo ընկերությունը 7 համարի մարզաշապիկը կրող տիկնիկի մասնակցությամբ մի քանի լուսանկար է հրապարակել։
Շվեդիայի դեմ խաղում Կրիշտիանուն հեթ-տրիկ ձևակերպեց ու իր թիմին դուրս բերեց ԱԱ-ի եզրափակիչ փուլեր, իսկ PepsiCo ընկերության ներկայացուցիչները ստիպված եղան ներողություն խնդրել պորտուգալացուց․
«Ոչ ոք իդեալական չէ, և մենք բոլորս էլ սխալներ թույլ ենք տալիս։ Կարևոր է տեսնել իրական ներողությունը։ Այդ իսկ պատճառով ․․․ ներողությունն ընդունված է, Pepsi!»,- պատասխանել էր Ռոնալդուն։
Ռոնալդուն որդուն ևս արգելում է գազավորված ըմպելիքներ խմել․ սննդակարգի միակ շեղումը պիցցան է
Ճիշտ սննդակարգի կանոններին հետևում է ոչ միայն Ռոնալդուն, այլև նրա ամբողջ ընտանիքը, մասնավորապես Ռոնալդուն վերահսկում է Կրիշտիանու-կրտսերի սննադակարգը։
«Տղաս ունի պոտենցիալ, տեսնենք՝ արդյոք կդառնա՞ մեծագույն ֆուտբոլիստ։ Երբեմն ինձ համար դժվար է նրա հետ, քանի որ նա երբեմն կոկա-կոլա և ֆանտա է խմում, ինչը վնասակար է օրգանիզմի համար։ Ես պայքարում եմ նրա հետ, երբ նա չիպսեր է ուտում, կարտոֆիլի ֆրի, այդ ամենն ինձ դուր չի գալիս։
Պարզապես ցանկանում եմ, որ նա լինի լավագույնն այն գործում, որով կզբաղվի։ Ես նրան միշտ ասում եմ, որ քրտնաջան աշխատանքն ամեն ինչից կարևոր է։
Ես 4 երեխա ունեմ և նրանց միշտ ամենալավն եմ մաղթում, բայց երբ նրանք շոկոլադ են ուտում ․․․ ես պետք է ուժեղ մնամ նման պահերին»,- մի անգամ պատմել է Ռոնալդուն։