Հայտնի է, թե ինչպես է ձախողվել Մասիմիլիանո Ալեգրիի՝ «Ռեալի» գլխավոր մարզչի պաշտոնում նշանակվելը:
Մադրիդյան ակումբը ցանկացել է բանակցություններ սկսել իտալացի մասնագետի հետ Զինեդին Զիդանի հեռացման մասին պաշտոնապես հայտարարելուց հետո: Այդպես «Ռեալը» ցանկացել է հարգանք դրսևորել թիմի արդեն նախկին գլխավոր մարզչի հանդեպ:
As-ը, հղում կատարելով սեփական աղբյուրներին, գրում է, որ Ալեգրին վախեցել է այս ամառ մնալ առանց ակումբի, քանի որ արդեն երկու տարի է՝ չի մարզել: «Ռեալը» չի հասցրել նույնիսկ բանակցություններ սկսել մասնագետի հետ, քանի որ չորեքշաբթի երեկոյան, երբ «Ռեալում» իմացել են Զիդանի հեռանալու մասին, Ալեգրին արդեն համաձայնության է եկած եղել «Յուվենտուսի» հետ՝ պայմանագրի պայմանների շուրջ:
Իտալացին նաև լուրջ առաջարկ է ունեցել «Ինտերից»: Չորեքշաբթի երեկոյան Ալեգրին և նրա ներկայացուցիչը հանդիպել են միլանյան ակումբի ներկայացուցիչների հետ, բայց չեն կարողացել համաձայնության գալ:
«Յուվենտուսը» մարզչի առաջ ուլտիմատում է դրել: Եթե նա չորեքշաբթի չտար իր համաձայնությունն ակումբ վերադառնալու հարցում, ապա հինգշաբթի ակումբը չեղյալ կհամարեր իր առաջարկը: Այդ իսկ պատճառով մարզիչը որոշել է չսպասել «Ռեալի» քայլերին:
Ալեգրիի այս որոշումը շատ է զարմացրել «Ռեալին»: Հիմա ակումբը գլխավոր մարզչի մի քանի թեկնածու է դիտարկում, մասնավորապես Անտոնիո Կոնտեին, Ռաուլին և Մաուրիսիո Պոչետինոյին: Հաշվի առնելով, որ Ալեգրիի տարբերակը խափանվեց, «Ռեալը» որոշակի ժամանակ կհատկացնի որոշում կայացնելուն: