Հայաստանի առաջատար գեղասահորդ, 23-ամյա Սլավիկ Հայրապետյանը Գազպրոմ Արմենիայի ուսումնա-սպորտային համալիրում նախապատրաստվում է հունվարի 21-ից Ավստրիայում մեկնարկելիք Եվրոպայի առաջնությանը:
Տղամարդկանց պայքարում Հայաստանը կներկայացնի Սլավիկ Հայրապետյանը, աղջիկներից մեր երկրի մարզական պատիվը կպաշտպանի Անաստասիա Գալուստյանը: Եվրոպայի առաջնությանը կմասնակցի նաև Թինա Կարապետյան-Սիմոն Սենեկալ պարային զույգը:
«Ընդհանուր նախապատրաստությունը շատ լավ է ընթացել, ու ներկայիս վիճակում ամեն ինչ շատ լավ է: Հուսով եմ` մյուս շաբաթվա ընթացքում իմ այս մարզավիճակը կպահպանվի: Երկուշաբթի մեկնելու ենք ավստրիական Գրաց քաղաք, որտեղ կայանալու է Եվրոպայի առաջնությունը: Հունվարի 22-ին լինելու է իմ կարճ ծրագիրը, որտեղ մտադիր եմ ցույց տալ իմ մաքսիմումը, կատարել լավ կարճ ծրագիր, որպեսզի անցնեմ հաջորդ փուլ ու հնարավորություն ունենամ ներկայանալու երկար ծրագրում: Երկար ծրագիրը նախատեսված է հունվարի 23-ին»,- պատմում է Սլավիկ Հայրապետյանը:
Սլավիկ Հայրապետյանը նշում է` ամռանը փոխել է իր ծրագիրն ու առաջիկա առաջնությանը հանդես կգա բոլորովին նոր ծրագրով ու նոր երաժշտությամբ:
Եվրոպայի առաջնությանը մեդալների համար 35 գեղասահորդ կպայքարի: Սլավիկ Հայրապետյանն ասում է` ոչնչով չենք զիջում մրցակիցներին.
«Մեր մարզաձևում շանսերը շատ են, բայց մրցման ժամանակ նույնիսկ ամենաուժեղ մարզիկը կարող է ամեն ինչ խափանել ու պարտվել: Այդ իսկ պատճառով նախապես չեմ ցանկանա խոսել սպասելիքների մասին: Ամեն դեպքում, կարող եմ ասել, որ մենք ոչնչով չենք զիջում մյուս մարզիկներին»:
Սլավիկ Հայրապետյանի հայրն ու անձնական մարզիչը` Սամվել Հայրապետյանը, խոսելով սպասվելիք առաջնության մասին, ընդգծում է`Սլավիկի մարզումներում ավելի շատ կայունություն է նկատվում.
«Նախապատրաստությունը լավ է անցել, ինչպես` միշտ: Հուսով ենք` սահադաշտը մեզ կօգնի, չենք սայթաքի: Ամեն ինչ սառույցից է կախված: Սլավի մարզումներում հիմա ավելի շատ է զգացվում կայունությունը: Ժամանակից առաջ չընկնենք, բայց հուսով եմ`կկարողանանք հաղթահարել կարճ ծրագրի փուլն ու լավագույն 24 գեղասահորդների թվում կլինենք, ովքեր կմտնեն եզրափակիչ:
Հիմա բավականին անսխալ ու լավ կատարում է իր բարդ էլեմենտները, կայուն կարգավիճակում, մրցման ժամանակ արդեն կտեսնենք: Ամեն դեպքում բոլոր շանսերն ունի հայտնվելու լավագույն 10-յակում»,- մեզ հետ զրույցում ասում է Սամվել Հայրապետյանը:
ԵԱ-ից հետո Սլավիկ Հայրապետյանը երկու միջազգային մրցաշարի կմասնակցի` նախ Տալլինում, ապա Լյուքսեմբուրգում, ինչից հետո` մարտի 16-ին Կանադայում իր ուժերը կչափի արդեն Աշխարհի առաջնությունում.
«Մրցաշրջանը սկսվել է սեպտեմբերին, բայց քանի որ առողջական որոշ խնդիրներ ունեի, մրցաշրջանն ամբողջ ծավալով չենք անցկացրել, ու մինչև Եվրոպայի առաջնությունը ես ընդամենը 2 մրցաշարի եմ մասնակցել: Ցանկացա 100 տոկոսով պատրաստվել Եվրոպայի առաջնությանը: Հուսով եմ` աշխարհի առաջնության ժամանակ էլ լավ պատրաստ կլինեմ:
Մոնրեալում կայանալիք աշխարհի առաջնությունից հետո վերադառնալու եմ Հայաստան ու սկսեմ նախապատրաստվել արդեն Հայաստանի առաջնությանը և պատրաստել իհարկե մեր մարզիկներին»:
Սլավիկ Հայրապետյանի խոսքով, Եվրոպայի ու աշխարհի առաջնությունները վարկանիշային են մեծերի աշխարհի Գավաթների համար:
«Երկրորդ տարին է` ես ռեզերվում եմ, եթե ինչ-որ մարզիկ վնասվածք է ստանում, նրան փոխարինում են պահեստային մարզիկներով: Երկու տարի է`ռեզերվի մեջ եմ, ու այս տարվա նպատակս գեղասահքի էլիտա մտնելն է, քանի որ մեծահասակների աշխարհի Գավաթին 6 հոգի է մասնակցում»,- ասում է Սլավիկ Հայրապետյանը ու նշում նաև, որ ապագայի հետ կապված իր գլխավոր նպատակներից մեկը 2022թ-ի ձմեռային Օլիմպիական խաղերի ուղեգիր ձեռք բերելն է:
Հաջորդ տարի կայանալիք աշխարհի առաջնության արդյունքներով 24 մասնակից 2022 թվականի ձմեռային Օլիմպիական խաղերի ուղեգիր կստանա: Ինչպես հայտնի է` Օլիմպիական խաղերին 30 գեղասահորդ է մասնակցում: Մյուս 6 տեղերի համար մարզիկները պայքարելու են սեպտեմբերին անցկացվելիք առանձին մրցաշարում:
Նարե Հովհաննիսյան
