Չեմպիոնների լիգայի 1/8-րդ եզրափակիչ փուլի առաջին հանդիպումները կավարտվեն այսօր։ Լիգայի ամենատիտղոսակիր ակումբը՝ «Ռեալը» հյուրընկալվելու է «Ատալանտային», իսկ Եվրոպայում այս պահին անվիճելիորեն լավագույն խաղը ցուցադրող «Մանչեսթեր Սիթին» արտագնա խաղում կմրցի «Բորուսիա» Մյունխենգլադբախի հետ։
«Ատալանտա» – «Ռեալ Մադրիդ»
Այս դիմակայությունը ամենահետաքրքիրներից է։ Մի կողմից ունենք մրցաշարի ամենափորձառու ու ամենատիտղոսակիր ակումբին, որը կադրային բազմաթիվ խնդիրներ ունի, իսկ մյուս կողմից վերջին տարիներին Եվրոպայում ամենատպավորիչ ֆուտբոլ ցուցադրող ու ոչնչից չվախեցող «Ատալանտան» է։ «Ռեալը» հիմա լավ ընթացքի մեջ է։ «Արքայական» ակումբը 4 անընդմեջ հաղթանակ է տարել Լա լիգայում։ Զինեդին Զիդանի՝ կորոնավիրուսից ապաքինվելուց հետո «Ռեալը» միայն հաղթում է ու այս խաղերում ընդամենը 1 գոլ է ընդունել սեփական դարպասը։
Ֆրանսիացի մասնագետը շատ լավ հասկանում է, որ «Ռեալի» կադրային խնդիրները առաջին հերթին ազդում են թիմի հարձակման գծին։ «Ռեալը» քիչ է խփում, դա Զիդանը փորձում է փոխհատուցել լավ խաղով պաշտպանությունում։ «Ատալանտայի» հետ մադրիդյան թիմին բարդ է լինելու, քանի որ նրանք խաղում են հարձակվողական ֆուտբոլ և իսկապես ոչնչից չեն վախենում։
«Ատալանտան» Ա սերիայի վերջին տուրում վստահ հաղթանակ է տարել «Նապոլիի» նկատմամբ 4-2 հաշվով։ Ջան Պիերո Գասպերինիի սաները վերջին 3 խաղերում 3 հաղթանակ են տարել՝ այդ թվում Իտալիայի գավաթի կիսաեզրափակիչում հաղթելով «Նապոլիին» ու նվաճելով գավաթի եզրափակիչի ուղեգիր։ «Ատալանտան» այս դիմակայությունում կորցնելու ոչինչ չունի։ Նրանք ամեն ինչ են դնելու «Ռեալի» դեմ խաղում՝ հաշվի առնելով Զինեդին Զիդանի թիմի կադրային բազմաթիվ խնդիրները։
Իտալիա չեն մեկնելու Սերխիո Ռամոսը, Էդեն Ազարը, Մարսելոն, Դանի Կարվախալը, Ֆեդե Վալվերդեն, Ռոդրիգոն, Ալվարո Օդրիոսոլան, Էդեր Միլիտաոն ու Կարիմ Բենզեման։ Վերջինս կարող էր խաղալ, սակայն ակումբն ու մարզիչը չեն ուզում ռիսկի դիմել։ Իտալիայում Զիդանը փորձելու է համեստ կազմով լավ արդյունքի հասնել, իսկ արդեն շաբաթներ անց հաստատել հաղթանակը Մադրիդում։
«Բորուսիա» Մյունխենգլադբախ – «Մանչեսթեր Սիթի»
Այստեղ, կարծես, ասելու շատ բան չկա։ «Մանչեսթեր Սիթին» ուղղակի ֆանտաստիկ մարզավիճակում է։ Նրանք 18 անընդմեջ հաղթանակ ունեն բոլոր մրցաշարերում, ինչը ռեկորդ է թե՛ ԱՊԼ-ում, թե՛ առհասարակ անգլիական թիմերի շրջանում։ Պեպ Գվարդիոլայի թիմը սլանում է դեպի հերթական չեմպիոնություն ու պետք է որ այս տպավորիչ մրցելույթները շարունակի նաև եվրագավաթում, որտեղ նրանց մրցակիցը «Բորուսիա» Մյունխենգլադբախն է։
Գերմանական թիմը լավագույն մարզավիճակում չէ։ Նրանք գերազանց խաղացին ՉԼ-ի խմբային փուլում՝ պայքարից դուրս թողնելով «Ինտերին», որոնք հիմա Ա սերիայում առաջատար են։ Սակայն հիմա «Բորուսիան» տառապում է Բունդեսլիգայում ու լավագույն մարզավիճակում չէ։ Վերջին 3 խաղերում 2 պարտություն ու մեկ ոչ-ոքի։ Նրանք 8-րդն են մրցաշարային աղյուսակում, ասել է թե «Ման Սիթին» հանդիպելու է այս պահի դրությամբ Բունդեսլիգայի միջինից բարձր ակումբի։
Թերևս, սա փլեյ-օֆֆ փուլի այն զույգն է, որտեղ գրեթե ամեն բան պարզ է դեռ դիմակայությունից առաջ։ «Մանչեսթեր Սիթին» պետք է որ առանց խնդիրների անցնի Մյունխենգլադբախի թիմին։ Ու այստեղ կարևոր է նաև հոգեբանական կողմը։ Մարկո Ռոզեի թիմը պետք է մոռանա, որ խաղում է մի թիմի դեմ, որը հաղթում է 18 անընդմեջ խաղերում բոլոր մրցաշարերում։ Սակայն դա անելը չափազանց բարդ է։ «Ման Սիթին» թե՛ հոգեբանական, թե՛ խաղային վերելքի մեջ է, ու նրանց կանգնեցնելը այս պահին իրատեսական չէ։
