«Ես շատ ուրախ եմ, որ ունեմ այսպիսի մրցակից, ով ինձ հավասար է ու կարող էր նաև գերազանցել, բայց չստացվեց այս անգամ: վստահեցնում եմ մեր հայ ազգին, որ Վարազդատը շատ լավ մարզիկ է և մի քանի տարի անց ամբողջ աշխարհը կլսի նրա մասին»,-խոսելով Հայաստանի առաջնությունում երկրորդ տեղը գրաված Վարազդատ Լալայանի մասին, ասաց չեմպիոնի կոչումը նվաճած Գոռ Մինասյանը:
Լալայանը երկամարտում ցույց տվեց 430 կգ արդյունք, 5 կգ-ով զիջելով Գոտ Մինասյանին: Չնայած ցույց տված արդյունքին, Մինասյանը վստահեցնում է, որ հանդես է եկել իր հնարավորություններից ավելի ցածր.
«Այս առաջնությանը հնարավորություններիս կեսն էլ ցույց չեմ տվել, պատճառն այն է, որ գրեթե երկու տարի ոչ մի առաջնության չենք մասնակցել: Կարծում եմ, բոլոր մարզիկների մոտ էլ կար այդ խնդիրը: Մինչև Եվրոպային առաջնությունն ամեն ինչ լավ կլինի ու իմ ուժերից ավելին ցույց կտամ, քանի որ տարին Օլիմպիական է»,-ասաց Գոռ Մինասյանը:
Ռիո-2016 Օլիմպիական խաղերի փոխչեմպիոնի խոսքով իր համար հետաքրքիր է նույն քաշային կարգում հանդես գալ Սիմոն Մարտիրոսյանի հետ:
«Սիմոնը մեր քաշային կարգում է հանդես գալիս, քանի որ չէր կարող քաշն իջացնել: Եթե Հայաստանի առաջնության համար քաշ գցի, հետո նույնն անի նաև Եվրոպայի առաջնության համար, դա վատ կանդրադառնա: Ինձ համար այս պայքարը շատ հետաքրքիր է, չնայած մարզումների ընթացքում էլ կա մարզումային մրցակցություն, բայց Սիմոնին դեռ չեմ պատկերացնում ծանրքաշում հանդես գալուց»,-նշեց Մինասյանը: