Ավստրալիայի բաց առաջնության մասնակիցները, պաշտոնական դեմքերն ու անձնակազմը կինքնամեկուսանան այն բանից հետո, ինչ մրցաշարի հյուրանոցի թիկնապահներից մեկի մոտ հաստատվել է կորոնավիրուս, հայտնում է BBC-ն։
Վիկտորիա նահանգի վարչապետ Դենիել Էնդրյուսի խոսքով՝ սա կարող է խանգարել փետրվարի 4-ին նախատեսված մարզումները Մելբուրն պարկում։ Նա նաև ասել է, որ սա չի ազդի Australian Open-ի անցկացմանը, քանի որ խաղացողները կարող են վերսկսել մարզումները բացասական թեստ ստանալուց հետո։
Այս օրերին Մելբուրնում ընթացող ATP Cup մրցաշարի ղեկավարությունն էլ որոշել է, որ հինգշաբթի մրցաշարի հանդիպումներ չեն կայանա, քանի դեռ բոլոր խաղացողները չեն թեստավորվել։
Հաղորդվում է, որ այն հյուրանոցում, որի թիկնապահի մոտ Covid-19 է ախտորոշվել, մնում են մոտ 1000 խաղացողներ, պաշտոնական դեմքեր ու անձնակազմի այլ ներկայացուցիչներ, որոնք Ավստրալիա գալուց հետո երկշաբաթյա կարանտին էին անցել։ Նրանցից 500-600 հոգին կարող են կոնտակտ ունենալ վարակված անձի հետ։
Ավստրալիայի բաց առաջնությունը նախատեսված է փետրվարի 8-ից 21-ը։