«Չելսին» հետաքրքրված է Դորտմունդի «Բորուսիայի» հարձակվող Էրլինգ Հոլանդի ծառայություններով: Լոնդոնյան ակումբը մտադիր է գործադրել առավելագույն ջանքերը, որպեսզի ձեռք բերի 20-ամյա հարձակվողին արդեն հաջորդ ամառ, գրում է The Athletic-ը:
Նորվեգացու՝ «Բորուսիայի» հետ պայմանագրում կետ կա 75 մլն եվրո հրաժարագնի վերաբերյալ, սակայն այն ուժի մեջ կմտնի միայն 2021/22 մրցաշրջանի ավարտից հետո:
Այդ իսկ պատճառով, ամենայն հավանականությամբ, գերմանական ակումբի ղեկավարությունը հաջորդ միջմրցաշրջանային հատվածում Հոլանդի համար ավելի բարձր գին կպահանջի:
Հաշվի առնելով այն, որ կորոնավիրուսի համավարակի պատճառով ստեղծված իրավիճակն ազդել է ֆուտբոլային թիմերի ֆինանսական վիճակի վրա, «Չելսիում» ենթադրում են, որ սա գուցե ակումբի համար լավագույն հնարավորությունը լինի Հոլանդին ձեռք բերելու համար, նույնիսկ եթե դրա համար իրենք ստիպված լինեն գերազանցել ակումբային ռեկորդը:
«Չելսիում» հասկանում են, որ ակումբին լուրջ մրցակցություն է սպասվում ֆուտբոլիստի համար պայքարում, սակայն միևնույն ժամանակ կարծում են, որ մյուս թիմերը կսպասեն 2022 թվականի ամռանը, որպեսզի տրանսֆերն ավելի մատչելի գումարով կարողանան իրականացնել:
Անցած ամառ «կապույտները» տրանսֆերների համար ավելի քան 200 մլն ֆունտ ծախսեցին, բայց մրցաշրջանի ավարտին ակումբը պատրաստ է շարունակել ներդրումները՝ կազմն ուժեղացնելու համար:
Հիշեցնենք՝ «Չելսին» տրանսֆերային ռեկորդ է սահմանել 2018 թվականի օգոստոսին՝ 71,6 մլն ֆունտի դիմաց (80 մլն եվրո) պայմանագիր կնքելով Բիլբաոյի «Աթլետիկի» դարպասապահ Կեպա Արիսաբալագայի հետ: Ընթացիկ մրցաշրջանից մեկնարկից առաջ «Չելսին» փոքր-ինչ ավելի ցածր գնով՝ 71 մլն եվրոյի դիմաց, ձեռք բերեց «Բայերի» կիսապաշտպան Կայ Հավերցին: