Իսպանիայի Լա լիգայի 10-րդ տուրից հետաձգված «Բարսելոնա» – «Ռեալ Մադրիդ» հանդիպումը կկայանա այսօր՝ դեկտեմբերի 18-ին Բարսելոնայի «Կամպ Նոու» ստադիոնում։ Հոկտեմբերի 26-ին նախատեսված հանդիպման հետաձգման պատճառների ու Կատալոնիայում այս օրերի իրավիճակի մասին մենք արդեն խոսել ենք։ Այսօր կխոսենք բուն հանդիպման մասին։
Խաղը վիթխարի նշանակություն ունի երկու կողմերի համար էլ։ Նախ առաջին հերթին սա Էլ կլասիկո է, ու սկզբունքայնությունը չափից դուրս մեծ է։ Միևնույն ժամանակ թիմերը 35-ական միավորով գլխավորում են Լա լիգայի մրցաշարային աղյուսակը ու ունեն լավ հնարավորություն մյուսից առաջ անցնելու։
Թիմերի ու նրանց լիդերների մարզավիճակը
Իզուր չէ, որ վերնագրի մեջ խոսել ենք ճիշտ ակնթարթի մասին։ Երկու թիմերն էլ լավ մարզավիճակում են։ Լա լիգայում վերջին հինգ խաղերից չորսում թիմերը հաղթել են և միայն նախորդ տուրում թե՛ «Բարսելոնան», թե՛ «Ռեալը» ոչ ոքի խաղացին։ Գերազանց մարզավիճակում են թիմի առաջատարները։
Լիոնել Մեսսին վեցերորդ «Ոսկե գնդակի» նվաճումից առաջ և հետո շարունակում է ապացուցել, որ արժանի էր այդ տիտղոսին։ 12 գոլ Լա լիգայի ընթացիկ մրցաշրջանում արգենտինացու հաշվին։ Նույնքան գոլ է խփել նաև Կարիմ Բենզեման։
Ֆրանսիացի հարձակվողը երբեք այսքան սիրելի չի եղել մադրիդյան ակումբի երկրպագուների կողմից, որքան հիմա է։ Բենզեման իսկապես դարձել է թիմի առաջատարը։
Կորուստներ․․․
«Ռեալում» այս առումով լուրջ խնդիրներ կան։ Չկա գլխավոր աստղը՝ Էդեն Ազարը, բացակայում է Մարսելոն։ Մարկո Ասենսիոն շատ երկար ժամանակով է դուրս մնացել շարքից։ Լուկաս Վասկես, Խամես Ռոդրիգես․ այս ֆուտբոլիստները ևս բացակայելու են։
Ի տարբերություն «Ռեալի», «Բարսելոնան» հանդիպմանը մոտենում է ավելի քիչ կորուստներով։ Չկա միայն Ուսման Դեմբելեն, որոշակի հարցականի տակ է Արտուրի մասնակցությունը։
Նոր աստղեր Էլ կլասիկոյում
Այս Էլ կլասիկոյին իր նորամուտը կարող էր նշել Էդեն Ազարը, սակայն, ինչպես արդեն նշեցինք, բելգիացին վնասվածք ունի։ «Ռեալի» մեկնարկային կազմում հավանաբար կլինի Ֆերլան Մենդին, ում համար սա առաջին հանդիպումն է «Բարսայի» դեմ։ Առաջին անգամ «կապտանռնագույնների» հետ խաղալու հնարավորություն կունենա նաև Ռոդրիգոն։ Ֆեդե Վալվերդեն Էլ կլասիկոներում իր նորամուտը արդեն նշել է։ Այս անգամ նա մեծ հավանականությամբ կլինի մեկնարկային կազմում՝ հատուկ կարգավիճակով։
«Բարսելոնայի» կազմում ակնառու երկու նորեկներ կան կլասիկոյի համար՝ Անտուան Գրիզման և Ֆրենկի դե Յոնգ։ Այս ֆուտբոլիստները մեկ անգամ չէ, որ խաղացել են «Ռեալի» դեմ։ Գրիզմանը մի ամբողջ պատմություն ունի «արքայական» ակումբի դեմ խաղերում՝ ՉԼ-ի եզրափակչում վրիպած 11 մետրանոցից մինչև իր նախկին խաղընկեր Տիբո Կուրտուայի դարպասը գրավելը։ Ֆրենկի դե Յոնգը «Այաքսի» այն հրաշալի թիմի գլխավոր դերակատարներից էր, որը դուրս թողեց «Ռեալին» ՉԼ-ից նախորդ խաղարկության 1/8 եզրափակչից։ «Ռեալի» դեմ հնարավոր է տեսնենք նաև Անսու Ֆաթիին կամ էլ Կառլոս Պերեսին, ովքեր բավականին հետաքրքիր տպավորություն են թողնում այս մրցաշրջանում։
Ո՞վ է հանդիպման մրցավարը
Հանդիպման մրցավար է նշանակվել Ալեխանդրո Խոսե Էրնանդես Էրնանդեսը։ Թեպետ մամուլը գրեց այս մրցավարի «հակամադրիդիստ» կարգավիճակի մասին, այնուամենայնիվ փաստենք, որ դա այդքան էլ այդպես չէ։ Էրնանդես Էրնանդեսի համար սա չորրորդ կլասիկոն է։ Առաջին երեքում գրանցվել է երեք տարբեր արդյունք՝ «Ռեալի» հաղթանակ, «Բարսելոնայի» հաղթանակ և ոչ-ոքի։
2015/2016 մրցաշրջանում «Կամպ Նոուում» «Ռեալը» հաղթեց 2-1։ Էրնանդես Էրնանդեսը այդ խաղում հեռացրել էր Սերխիո Ռամոսին։ 2016/2017 մրցաշրջանում Էրնանդես Էրնանդեսը նշանակվել էր «Սանտիագո Բեռնաբեուում» կայանալիք հանդիպման մրցավար։ Այն ավարտվեց «Բարսելոնայի» հաղթանակով 3-2 հաշվով։ Լիոնել Մեսսիի՝ վերջին րոպեին խփած գոլն ու այն յուրահատուկ ոճով տոնելը հիշում են բոլորը։ Վերջին հանդիպումը թիմերի միջև, որը սպասարկել է Էրնանդեսը, դարձյալ «Կամպ Նոուում» է եղել։ 2017/2018 մրցաշրջանում այդ խաղում գրանցվեց ոչ-ոքի՝ 2-2 հաշիվը։
Իրավիճակը՝ վերահսկողության տակ
Թիմերը հանդիպումից առաջ հանգրվանելու են նույն հյուրանոցում ու մարզադաշտ են ժամանելու խաղի մեկնարկից երկու ժամ շուտ։
Մադրիդի «Ռեալի» անձնակազմի անվտանգությունը ապահովելու համար Բարսելոնայի «Էլ-Պրատ» օդանավակայանից հատուկ ծառայություն է իրականացվելու «արքայական» ակումբի ինքնաթիռի վայրէջքից անմիջապես հետո։ Թիմերի ավտոբուսները միասին են ուղևորվելու դեպի «Կամպ Նոու»։ «Ռեալի» ավտոբուսին ուղեկցելու է ոստիկանական 12 մեքենա։ Ինչպես հասկանում եք, այսօր ծանր օր է լինելու ոչ միայն կանաչ տիրույթում, այլ նաև ամբողջ Բարսելոնայում։
Իսկ կանաչու՞մ
Մեզ, սակայն, հետաքրքրում է այն, ինչ կկայանա ֆուտբոլային դաշտում։ Թերևս ակնհայտ է, որ «Ռեալը» գնդակը կտա մրցակցին ու կխաղա երկրորդ համարով, քանզի խաղում է դրսում։ Զիդանը մեկնարկային կազմում միգուցե ներառի Գարեթ Բեյլին, հակագրոհների ժամանակ արագության ապահովման համար։
Ռոդրիգոն նման խաղերի փորձ չունի։ Ֆեդե Վալվերդեին հատուկ հանձնարարություն է տրվելու՝ հսկել Լիոնել Մեսսիին, ու կարևոր միջանցք լինել «Ռեալի» պաշտպանության ու գրոհների կազմակերպման գործում։
«Բարսելոնան» կարող է օգտագործել գրոհի աջ եզրը, որտեղ շատ հաճախ կարող է հայտնվել նույն Մեսսին։ «Ռեալի» պաշտպանության ձախ եզրում խաղալու է Մենդին, ով գլխավոր թույլ օղակն է լինելու մադրիդյան թիմի պաշտպանության։ «Բարսելոնան», այո՛, կխաղա առաջին համարով, սակայն դա չի խանգարի Վալվերդեի թիմին օգտագործել բաց տարածությունները, որոնք «Ռեալը» տալու է, քանզի գրոհելիս մադրիդցիները մեծ ուժեր են կենտրոնացնելու հակառակորդի կիսադաշտում։
Մի խոսքով․․․Հեշտ չէ հասկանալը, թե ինչպիսի հանդիպում է մեզ սպասվելու։ Զոհասեղանին շատ բան կա դրված ու բարդ է լինելու ֆուտբոլիստների, մարզիչների, երկրպագուների, անվտանգության աշխատակիցների ու անգամ մեկնաբանների համար։
Ինչպես Էլ կլասիկոներից մեկի մեկնաբանելու ընթացքում ասել է Կոնստանտին Գենիչը․ «բարդը առաջին 90 րոպեն է, հետո հեշտ է լինելու․․․»
Հիասքանչ ֆուտբոլի սպասումով։
Արամ Սահակյան
