Սոլոմոն Իմե Ուդոյի հետ վերջին անգամ խոսել էինք, երբ նա դեռ «Շիրակում» էր հանդես գալիս։ Ասում է՝ այդ ժամանակվանից ի վեր կյանքում շատ բաներ են տեղի ունեցել ու հստակեցնում․
«Փոխել եմ ակումբս ու հավաքականից հրավեր ստացել»։
Պատմում է, որ «Շիրակից» որոշել է հեռանալ «Արարատի» աշխատակիցներից մեկի հետ հանդիպելուց հետո․
«Նա ինձ պատմեց այն փոփոխությունների մասին, որ ուզում են անել, պատմեց իրենց նպատակների մասին։ Բավականին համոզիչ էր, ու ասաց, որ ես նույնպես կամ իրենց ծրագրերում»։
Այն փաստը, որ «Շիրակի» շատ խաղացողներ այդ ընթացքում տեղափոխվեցին «Արարատ», չի ազդել ֆուտբոլիստի որոշման վրա։ Նրան գրավել են միայն ակումբի պլաններն ու նպատակները։ Եվ չնայած այս ամենին՝ Գյումրիից հեռանալը հեշտ չէր․ հենց «Շիրակն» էր օգնել նրան զարգացնել խաղը։
«Շատ էի սիրում այդ թիմը»,- ArmSport-ի հետ զրույցում ասում է նիգերիացի ֆուտբոլիստը, որն արդեն հագնում է նաև Հայաստանի ազգային հավաքականի մարզաշապիկը։
«Հավաքականից հրավերի չէի սպասում։ Ուղղակի կենտրոնացած էի ակումբում խաղիս վրա։ Կարող եմ ասել, որ այն անակնկալ էր ինձ համար»,- խոստովանում է ֆուտբոլիստը՝ ասելով, որ
Յուրաքանչյուր ֆուտբոլիստի համար ազգային հավաքականում խաղալը երազանք է․
«Այդ հրավերն ինձ շատ ուրախացրեց։ Այն ցույց տվեց, որ ես իրոք ջանասիրաբար աշխատում եմ»։
Հայաստանի հավաքականում խաղալու համար Ուդոյին մոտիվացնում է տեղացի մարդկանց սերն իր հանդեպ, ինչպես նաև հավաքականում խաղալու իր երազանքը։
Հիշում է, որ առաջ երազում էր Նիգերիայի հավաքականում խաղալու մասին։ Հարցնում եմ՝ ինչու չստացվեց հասնել երազանքին․
«Որովհետև դա էր Աստծու ծրագիրը։ Նա գիտի՝ ինչպիսին պիտի լինի ապագան»,- բացատրում է Հայաստանի հավաքականի նորեկը, որը նորամուտը նշեց Էստոնիայի դեմ խաղում։
«Հեշտ խաղ չէր։ Դա նոր փուլ էր իմ կարիերայում։ Ոգևորիչ էր դուրս գալ խաղադաշտ՝ իմանալով, որ շատ մարդիկ սպասում են, որ լավ ելույթ ունենաս»,- վերհիշում է Ուդոն։
Հայաստանի հավաքականը, ըստ Սոլոմոնի, Ազգերի լիգայում այդ հաջողությունը գրանցեց շնորհիվ թիմային բարձր ոգու։
«Տեսնում էի՝ ինչպես են բոլորը ձգտում ավելիին։ Աշխատակազմի շնորհիվ թիմը մի ամբողջություն էր դարձել։ Բոլորը դրական էին տրամադրված ու ոգևորում էին մեկը մյուսին։ Հիանալի էր։ Կարծում եմ՝ դա շատ օգնեց թիմին»։
Հայաստանի հավաքականը ԱԱ-2022-ի որակավորման փուլի J խմբում հայտնվեց Լիխտեյնշտեյնի, Իսլանդիայի, Ռումինիայի, Հյուսիսային Մակեդոնիայի ու Գերմանիայի հետ։ Ուդոն կարծում է, որ Հայաստանի ընտրանին յուրաքանչյուր խաղին պիտի դրական տրամադրվածությամբ մոտենա ու փորձի միավորներ ձեռք բերել յուրաքանչյուր խաղում։
Իսկ մինչ այդ այսօր՝ դեկտեմբերի 10-ին, «Արարատը» տարվա վերջին հանդիպումը կանցկացնի՝ մրցելով «Վանի» հետ։
«Կարծում եմ՝ բարդ խաղ կլինի, որովհետև մրցակիցը լավ թիմ ունի ու տակտիկապես լավ է պատրաստված։ Իսկ մենք ուղղակի պիտի մեր լավագույն խաղը ցուցադրենք ու փորձենք չնյարդայնանալ»,- ասաց Ուդոն։
«Վան»-«Արարատ» 7-րդ տուրից հետաձգված հանդիպումը կմեկնարկի 14:00-ին։ Թիմերը պատմության մեջ կհանդիպեն առաջին անգամ։
Ստելլա Բաբլոյան