ArmSport.am-ը շարունակում է ամփոփել հայկական թիմերի ելույթները Բարձրագույն խմբի առաջնության աշնանային հատվածի ավարտից հետո:
Հերթական անդրադարձը «Շիրակի» մասին է.
«Շիրակ». 15 հանդիպում, 7 հաղթանակ, 4 ոչ-ոքի, 4 պարտություն
«Շիրակը» բավականին հաջող մեկնարկեց առաջնությունում, բայց աստիճանաբար նահանջեց և այժմ 5-րդ հորիզոնականում է:
Հատկապես վերջին շրջանը վատ դասավորվեց Գյումրիի թիմի համար, որը 3 անընդմեջ պարտություններ կրեց:
Բիչախչյանը
Վարդան Բիչախչյանը շարունակում է իր ծավալուն աշխատանքը կատարել և իր գործունեությամբ նպաստել հայկական ֆուտբոլի զարգացմանը: Խոսքը Հայաստանի` վերջին տարիների «ամենակայուն» մարզչի մասին է:
Բիչախչյանի համակարգված աշխատանքը երիտասարդ ֆուտբոլիստների և լեգիոներների հետ վառ արտահայտված է նաև ընթացիկ առաջնությունում:
Կազմը
Այս մրցաշրջանում «Շիրակի» առաջատարը Մորի Կոնեն է: Իվուարցին նաև ԲԽ-ի ընթացիկ առաջնության լավագույն ռմբարկուն է խփած 11 գոլով: Ռմբարկուական հետաքրքիր մրցավազք է սպասվում նրա «Լոռիի» հարձակվող Ջոնել Դեսիրեի (10) միջև:
Ընդհանուր առմամբ, «Շիրակի» կազմը բավականին բազմաբնույթ է: Փորձառու Հրայր Մկոյանի, Աղվան Դավոյանի նաև Էդգար Մալաքյանի կողքին գործում են երիտասարդներ Ժիրայր Մարգարյանը, Ռաֆիկ Միսակյանը, Ռուդիկ Մկրտչյանը: Մկրտչյան-Միսակյան զույգը կայուն խաղաժամանակ է ստանում երիտասարդական հավաքականում. նրանք համարվում են հայկական ֆուտբոլի հույսերից:
Շատ կարևոր նշանակություն ունի նաև Արտյոմ Միքայելյանի, Առլեն Ծատուրյանի և մյուս պատանի ու երիտասարդ ֆուտբոլիստների առկայությունը: Նրանց հետ հույսերը նույնպես մեծ են:
Բավարար խաղաժամանակ է ստանում նաև հիմնականում փոխարինման մտնող Արամ Մուրադյանը, ով դեռ մեկ գոլ է խփել: Ռուսաստանում ամբողջ կարիերան անցկացրած Արտյոմ Գևորգյանն էլ 9 խաղում 2 գոլ է խփել:
«Շիրակի» ներկայիս կազմում առանցքային նշանակություն ունեն նաև լեգիոներներից Սոլոմոն Իմե Ուդոն, Մարկո Պրլևիչը, Փոլ Մուսա Բակայոկոն:
Հայաստանի Գավաթ
Հայաստանի կրկնակի գավաթակիրը դուրս է մնացել Գավաթի ընթացիկ խաղարկությունից:
1/8 եզրափակչից պայքարը սկսած «Շիրակը» 1:2 հաշվով պարտվել է «Գանձասար-Կապանին»:
Համառ պայքարը
«Շիրակն» ունի 25 միավոր և ընդամենը 3 միավոր է զիջում առաջատար «Լոռիին» և 2` մյուս 3 թիմերին: Եթե չլինեին վերջին 3 պարտությունները, Գյումրիի թիմը անգամ ոչ-ոքիներ խաղալու դեպքում «Լոռիի» հետ կգլխավորեր մրցաշարային աղյուսակը, բայց կա այն, ինչ կա…:
Հարկ է չմոռանալ նաև, որ «Շիրակի» ներկայիս դիրքը բավականին մոտ է նաև ստորին խմբին: 7-րդ տեղում գտնվող «Փյունիկին» «Շիրակը» գերազանցում է 5 միավոր:
Գարնանային հատվածում առաջին 3 խաղերը որոշիչ են լինելու: Մի բան հստակ է, «Շիրակը» կորցնելու ոչինչ չունի և ջանք չի խնայելու նախ վեցնյակում տեղ ունենալու և իհարկե ամենավերին հորիզոնականներում լինելու համար:
Նախորդ մասերը.
«Լոռի»
«Արարատ-Արմենիա»
«Ալաշկերտ»
«Արարատ»
Արման Առաքելյան
