Հայաստանի Բարձրագույն խմբի առաջնության 15-րդ տուրը վերջինն էր 2019 թվականին: ԲԽ-ում արձակուրդ է մինչև փետրվարի վերջ:
ArmSport.am-ը շարունակում է ամփոփել հայկական թիմերի ելույթները: 3-րդը «Ալաշկերտն» է:
«Ալաշկերտ». 15 հանդիպում, 8 հաղթանակ, 3 ոչ-ոքի, 4 պարտություն
«Ալաշկերտը» անհաջող մեկնարկեց ընթացիկ առաջնությունը 4 խաղերում 2 պարտությունից և 1 ոչ-ոքիից հետո Խաշմանյանի հետ պայմանագիրը խզվեց և գլխավոր մարզչի պաշտոնակատար նշանակվեց Արմեն Ադամյանը:
Ներկա դրությամբ գործող գավաթակիրը առաջնության ամենաշատ գոլ խփած (28) թիմն է:
Ադամյանը Խաշմանյանից հետո
Արմեն Ադամյանի գլխավորությամբ «Ալաշկերտը» առաջընթաց գրանցեց: Թիմի խաղը առավել հավաք ստացվեց և ավելի շատ արդյունքին միտված:
Ադամյանի գլխավորությամբ «Ալաշկերտը» 4 անընդմեջ հաղթանակ տարավ, ապա 2 անընդմեջ պարտություններ «Արարատ-Արմենիայից» և «Լոռիից»: Հաջորդիվ՝ ոչ-ոքի, հաղթանակ, դարձյալ ոչ-ոքի:
Կարելի է ասել, որ Արմեն Ադամյանը նորմալ է կատարել աշխատանքը այս փուլում:
Հարցն այն է, որ «Ալաշկերտի» ելույթները բավականին հակասական են:
Կազմը
Ուրույն հավասարություն կա թիմի հայ ֆուտբոլիստների և լեգիոներների միջև: Տարոն Ոսկանյանը, Արտակ Գրիգորյանը, Վահագն Հայրապետյանը, Գագիկ Դաղբաշյանը. Հայկ Իշխանյանը թիմի առաջատարներից են:
Տոն տվող ֆուտբոլիստներից են նաև Գուտավո Մարմենտինին, Գալվաոն, Ալեքսանդր Գլիշիչը:
Այս ամենից զատ, թիմն ամբողջացնում են նաև Նիկիտա Տանկովը, Արթուր Եդիգարյանը, Սարգիս Շահինյանը:
Ակնհայտ է, որ Օգնյեն Չանչարևիչը դեռևս հաղթում է հեռանկարային դարպասապահ Հենրի Ավագյանի հետ մրցակցությունը:
Բարձրագույն խմբի ընթացիկ առաջնությունում «Ալաշկերտի» լավագույն ռմբարկուն Գուստավո Մարմենտինին է, ով 7 գոլ է խփել: 5-ական գոլ են խփել Գալվաոն և Գլիշիչը:
Հայաստանի Գավաթ
Գործող գավաթակիրն ավարտել է ելույթները Գավաթի ընթացիկ խաղարկությունում:
1/8 եզրափակչում «Ալաշկերտը» վստահորեն հաղթեց Առաջին խմբի ներկայացուցիչ «Տորպեդոյին»` 3:1: Քառորդ եզրափակչում Ադամյանի գլխավորած թիմը նույն հաշվով պարտվեց «Գանձասար-Կապանին»` զիջելով կիսաեզրափակչի ուղեգիրը:
Թարմացման և երիտասարդանալու կարիք ունեցող թիմը
«Ալաշկերտի» կազմը համալրված է հիմնականում տարեց հայ ֆուտբոլիստներով: Մրցաշրջանի մեկնարկից առաջ «Ալաշկերտը» մի քանի լավ համալրումներ է ունեցել` Գոռ Մանուկյան, Էդուարդ Ավագյան, Դավիթ Ղանդիլյան. այս ֆուտբոլիստները հիմնականում հանդես են գալիս Առաջին խմբում: Մի բան հստակ է. նրանց խաղաժամանակ է հարկավոր:
Ակնհայտ է նաև, որ Միհրան Մանասյանի, Գեղամ Ղադիմյանի արդյունավետությունն ընթացիկ առաջնությունում ցածր է, ուստի Ադամյանից և իր շտաբից պահանջվում է մրցակցության նոր մակարդակի հասնել: Հասկանում ենք, որ այս կազմը ընտրվել է ավելի վաղ, բայց տրանսֆերային առաջիկա պատուհանը մեծ հնարավորություններ կարող է ընձեռել «Ալաշկերտի» համար:
«Լոռիի» ելույթների ամփոփումն` այստեղ, «Արարատ-Արմենիայինը»` այստեղ:
Արման Առաքելյան
