Վազգեն Սարգսյանի անվան Հանրապետական մարզադաշտի ասուլիսների սրահում վայրկյաններ առաջ ավարտվեց Հայաստանի ազգային հավաքականի գլխավոր մարզիչ Խոակին Կապառոսի նախախաղային մամուլի ասուլիսը՝ Ազգերի լիգայի 2-րդ տուրի Հայաստան-Էստոնիա հանդիպմանն ընդառաջ:
«Իհարկե դիտել եմ Էստոնիա-Վրաստան խաղը: Մեր խմբում հավասար հնարավորությամբ թիմեր են, և մեծ դեր կարող է խաղալ նաև մարզական բախտը, ինչպես նաև ցանկացած անհաջող գործողություն կարող է վճռորոշ լինել ընդհանուր արդյունքի համար: Ես հպարտ եմ այս մեկ շաբաթում Հայաստանի հավաքականի հետ տարած աշխատանքով, քանի որ տեսա, որ ֆուտբոլիստները մեծ աշխատասիրություն են դրսևորում և պատրաստ են պաշտպանել իրենց երկրի գույները»,-ասաց Կապառոսը:
Կորոնավիրուսով պայմանավորված դադարի ազդեցության մասին
-Իհարկե մեծ ազդեցություն է թողել, բայց դա վերաբերվում է բոլոր հավաքականներին: ՀՖՖ-ն արել է ամեն բան, որ ֆուտբոլիստները կարողանան գալ ու խաղալ հավաքականի համար: Իհարկե մեծ նշանակություն ունի նաև այն, որ հանդիպումներն անցնում են առանց երկրպագուների:
Էստոնիայի հետ կայանալիք խաղի մասին
-Երկու թիմերն էլ նմանատիպ տակտիկական սխեմա են օգտագործում: Բնականաբար երկու թիմերն էլ կփորձեն ստեղծել գոլային պահեր: Նաև շատ կարևոր է, որ հուսալի խաղ ցուցադրենք պաշտպանությունում: Կփորձենք խաղալ հարձակվողական ֆուտբոլ, սակայն չմոռանանք, որ գոյություն ունի մրցակից, որը փորձելու է խանգարել մեզ: Մենք խանդավառությամբ լի ենք և խաղալու ենք նվիրումով: Պետք է հստակ հասկանալ թե ինչ է պետք անել, երբ գնդակը քեզ մոտ է, և ինչ անել՝ երբ դու առանց գնդակի ես: Առջևում 24 ժամ ունենք և դեռ կմտածենք, թե ովքեր են լինելու մեկնարկային կազմում:
Հյուսիսային Մակեդոնիայի հետ խաղի մասին
-Բնականաբար հեշտ չէ, երբ 4-րդ րոպեին գոլ ես բաց թողնում, իսկ րոպոներ անց ևս մեկը: Ամեն դեպքում, թիմը պայքարեց: Իհարկե մեծ ազդեցություն ունեցավ նաև շոգ եղանակը: Եթե քեզ հաղթել են՝ նշանակում է քեզ գերազանցել են: Մենք պետք է կարողանանք հնարավորինս խորը վերլուծել և ճիշտ հետևություններ անել:
Հայաստանի հավաքականում իր գործունեության մասին
-Ես շատ ուրախ եմ և երջանիկ, որ գլխավորել եմ Հայաստանի հավաքականը: Մենք իհարկե նոր ֆուտբոլիստներ պետք է հրավիրենք և սերնդափոխության գնանք: Նորեկները շատ են և ես կփորձեմ անել ամեն ինչ, որպեսզի ամեն ինչ լավ ընթանա:
Հենրիխ Մխիթարյանի բացակայության պատճառների մասին.
-Դատելով իմ զրույցից նրա հետ, կարող եմ ասել, որ որևէ կոնֆլիկտ գոյություն չունի՝ կապված ՀՖՖ-ի հետ: Մխիթարյանն արդեն պատրաստ է հաջորդ ամիս միանալ հավաքականին:
Վահան Բիչախչյանի մասին
-Նա ինձ հաճելիորեն զարմացրեց իր որակներով և պրոֆեսիոնալիզմով: Նա հիանալի ֆուտբոլիստ է և մեծ ապագա ունի, ինչը նրան ասել եմ: Կարծում եմ՝ շատ արագ նա կսկսի մեծ դեր ունենալ Հայաստանի հավաքականում:
Նորբերտո Բրիասկո Բալեկյանի մասին
-Բրիասկոն կարևոր ֆուտբոլիստ է հավաքականի համար, բայց բանն այն է, որ արգենտինայում լրիվ այլ վիճակ է կապված կորոնավիրուսի հետ և Նորբերտոն երկար ժամանակ է մարզումներ չէր անցկացրել: Դեռ չեմ կարող ասել նա վաղը կլինի հիմնական կազմում թե ոչ, բայց նրան հիմա պակասում է խաղային պրակտիկան:
Հիշեցնենք, որ Հայաստան-Էստոնիա հանդիպումը կկայանա սեպտեմբերի 8-ին և կմեկնարկի 20:00-ին:
