Այսօր՝ մայիսի 14-ին Միջազգային Օլիմպիական կոմիտեի (ՄՕԿ) գործկոմը հեռավար նիստ կանցկացնի։ Այդ մասին հայտնում է ՀԱՕԿ-ի պաշտոնական կայքը։
Դրանք սովորաբար տևում են երկու-երեք օր, սակայն այս անգամ բոլոր հարցերը կքննարկվեն մեկ օրում։ Օրակարգում Տոկիո-2020-ի հետաձգման հետևանքների, կորոնավիրուսի համաճարակի, ֆինանսական կորուստների, հակադոպինգային ծրագրերի, հեռարձակողների համաձայնագրերի, խաղերի նախապատրաստության և այլ հարցեր են ընդգրկված։
Վերջերս Տոկիո 2020-ի կազմկոմիտեի ղեկավար Յոշիրո Մորին խոստովանել է, որ մինչև 2021 թվականը հետաձգված Օլիմպիական խաղերը հնարավոր է ընդհանրապես չեղյալ հայտարարվեն, եթե այդ ժամանակ կորոնավիրուսը դեռ սպառնա մարդկանց առողջությանը: Ֆունկցիոնալ գործչին մեջբերում է Nikkansports-ը:
Հիշեցնենք՝ Տոկիոյի Օլիմպիական խաղերը մեկ տարով հետաձգվեցին և կանցկացվեն 2021 թվականի ամռանը՝ հուլիսի 23-ից օգոստոսի 8-ը:
Տոկիոյի Օլիմպիական խաղերի տեղափոխումը 2021 թ․ ՄՕԿ-ի համար կարժենա մի քանի հարյուր միլիոն դոլար: Այս մասին հայտարարել էր ՄՕԿ-ի նախագահ Թոմաս Բախը՝ welt.de-ին։ Դեռ հաշվարկ չի կատարվել, բայց փաստ է, որ լրացուցիչ մեծ ծախսեր կառաջանան։ ՄՕԿ-ը տևական ժամանակ չէր համաձայնում հետաձգել խաղերը՝ հիմնականում սպասվող ֆինանսական կորուստների պատճառով։ Ամենամեծ վնասը կրել է Ճապոնիան․ երկիրը նախապատրաստության վրա ծախսել է ավելի քան 12 միլիարդ դոլար:
