ՈւԵՖԱ-ի Ազգերի լիգայի խաղարկության խմբային փուլի վերջին տուրում Հայաստանի ազգային հավաքականն այսօր արտագնա հանդիպում անցկացրեց Լատվիայի ընտրանու հետ։ «Սկոնտո» մարզադաշտում կայացած հանդիպումն ավարտվեց ոչ–ոքի՝ 0–0 հաշվով։
Հանդիպման արդյունքը մեկնաբանել է Լատվիայի հավաքականի գլխավոր մարզիչ Պաոլո Նիկոլատոն։
«Մենք լավ ֆուտբոլ խաղացինք և ստեղծեցինք մի քանի հիանալի գոլային պահեր։ Իհարկե, մենք մեր լավագույն մարզավիճակում չէինք, բայց ես գոհ եմ խաղից և ընդհանուր առմամբ գործընթացից։ Նման խաղերը երբեմն նույնիսկ ավելի կարևոր են մեր զարգացման համար, քան անհատական հաղթանակները։ Մենք լավ խաղացինք ուժեղ մրցակցի դեմ և արժանի էինք հաղթանակին», — ասաց Նիկոլատոն։
Նիկոլատոն ընդգծեց, որ Լատվիայի ազգային հավաքականի գլխավոր նպատակն այժմ իրենց խաղի որակը բարելավելն ու մոտեցումը փոխելն է, այլ ոչ թե միայն արդյունքների վրա կենտրոնանալը։
«Մենք փորձեցինք ագրեսիվ խաղալ, բայց մենք նաև պետք է երկրորդ խաղը հաշվի առնեինք որպես գործոն։ Ֆուտբոլիստները խաղադաշտում իրենց ամբողջ ուժը տվեցին. նրանք հավատում են այս գործընթացին և փիլիսոփայությանը: Մենք ուզում ենք փոփոխություններ, և փոփոխությունն ավելի կարևոր է, քան արդյունքը: Արդյունքները լավ ֆուտբոլի արդյունքն են», — բացատրեց մարզիչը։
«Կարծում եմ՝ խաղի որոշակի պահերին մենք լիովին պատրաստ չենք: Մենք խաղադաշտում որակյալ խաղացողներ ունենք, բայց մեր մրցակիցները հաճախ ավելի ճշգրիտ են, հատկապես վճռորոշ պահերին: Հենց վճռորոշ պահերին խաղն է որոշում արդյունքը, բայց ընդհանուր առմամբ, կասեի, որ այս գործընթացի սկզբից ի վեր առաջընթացը անհավանական է եղել։ Ես հավատում եմ այս գործընթացին և վայելում եմ այս թիմի հետ աշխատանքը: Ես լիովին գոհ եմ տղաներից և իմ օգնականների աշխատանքից: Մենք պետք է համբերատար լինենք»– ասել է Նիկոլատոն հանդիպումից հետո։
Հայաստանի, Լատվիայի, Չեռնոգորիայի և Կիպրոսի հավաքականներն ընդգրկված են 2-րդ խմբում։ Վերջին տուրի հանդիպումների արդյունքներն արդեն չէին կարող ազդել թիմերի տեղերի վրա աղյուսակում․ խմբի աղյուսակում թիմերի դասավորվածությունն արդեն իսկ հայտնի էր նախորդ տուրի արդյունքներով։
Այսպիսով, Հայաստանի հավաքականն Ազգերի լիգայի այս մրցաշրջանն ավարտեց երրորդ տեղում՝ վաստակելով 6 միավոր։ Մեր թիմը խմբային փուլում տոնեց մեկ հաղթանակ՝ Երևանում հաղթելով Լատվիայի ընտրանուն, գրանցեց երեք ոչ–ոքի և երկու պարտություն կրեց։ Չեռնոգորիայի հավաքականն առաջին տեղում է, Կիպրոսը՝ երկրորդ, իսկ Լատվիայի ընտրանին՝ եզրափակեց աղյուսակը։
Մրցաշարային աղյուսակն այս պահին՝ ստորև․
