Կատալոնական «Բարսելոնան» լուրջ կադրային կորուստ ունի Մադրիդի «Ռեալի» դեմ կայանալիք «Էլ Կլասիկոյից» առաջ։
Թիմի կիսապաշտպան Դանի Օլմոն վնասվածք է ստացել Չեմպիոնների լիգայի լիգայի փուլի 3-րդ տուրի՝ ՊՍԺ-ի դեմ արտագնա խաղում (2:4) և տևական ժամանակով շարքից դուրս մնացել։
Կատալոնական ակումբի մամուլի ծառայությունը X-ի իր միկրոբլոգում պաշտոնապես հաստատել է ֆուտբոլիստի վնասվածքի լրջությունը.
«Անցկացված բուժզննումները հաստատել են, որ Դանի Օլմոն ՊՍԺ-ի դեմ խաղում մրցակցի հետ բախման հետևանքով ստացել է ձախ ոտքի առբերիչ մկանի վնասվածք։ Սպասվում է, որ ֆուտբոլիստը բաց կթողնի շուրջ մեկ ամիս»,— ասված է ակումբի տարածած հաղորդագրության մեջ։
Ցավալի դրվագը տեղի է ունեցել հոկտեմբերի 20-ին կայացած հանդիպման 29-րդ րոպեին։ Գնդակի համար պայքարում փարիզցիների կիսապաշտպան Վիտինյայի հետ բախումից հետո Օլմոն անհաջող է հենվել ոտքին և սուր ցավ զգացել ձախ ազդրի հատվածում։ Իսպանացի ֆուտբոլիստը չի կարողացել շարունակել խաղը՝ իր տեղը զիջելով Ֆերմին Լոպեսին։ Հանդիպումից անմիջապես հետո «կապտանռնագույնների» գլխավոր մարզիչ Հանսի Ֆլիկը ևս մտահոգություն էր հայտնել՝ նշելով, որ ֆուտբոլիստն ուժեղ հարված է ստացել, իսկ իսպանական AS-ը և Mundo Deportivo-ն դեռ նախնական զննումից հետո բացառել էին նրա մասնակցությունն առաջիկա սկզբունքային խաղին։
Հատկանշական է, որ ՊՍԺ-ի դեմ հանդիպումն Օլմոյի համար հոբելյանական՝ 100-րդն էր «Բարսելոնայի» մարզաշապիկով։ Ավելին՝ մինչ այս վնասվածքը նա մասնակցել էր կատալոնական ակումբի վերջին 44 անընդմեջ հանդիպումներին (32 խաղ նախորդ մրցաշրջանում և 12-ը՝ ընթացիկում)։ Հավելենք նաև, որ իսպանացին նախկինում ևս նմանատիպ խնդիր ունեցել է. 2025 թվականի մարտին նրա մոտ ախտորոշվել էր աջ ոտքի մկանի միոֆասցիալ վնասվածք, որի պատճառով նա բացակայել էր շուրջ երեք շաբաթ։
Հիշեցնենք, որ փարիզյան թիմի դեմ հանդիպումն իսկական փորձություն դարձավ երկու ակումբների առաջատարների համար. վնասվածքների պատճառով խաղադաշտը հարկադրաբար լքեցին նաև ՊՍԺ-ի առանցքային խաղացողներ Խվիչա Կվարացխելիան, Ուսման Դեմբելեն և Մարկինյոսը։
Հավելենք, որ «Բարսելոնա» – «Ռեալ Մադրիդ» հանդիպումը կկայանա կիրակի՝ հոկտեմբերի 25-ին, «Սպոտիֆայ Կամպ Նոու» մարզադաշտում։ Մեկնարկը՝ Երևանի ժամանակով 23:55-ին։
