Հեղինակավոր Transfermarkt պորտալը ներկայացրել է ՈւԵՖԱ-ի Ազգերի լիգայի մասնակից հավաքականների շուկայական արժեքների վարկանիշային աղյուսակի երրորդ հատվածը՝ հատուկ անդրադարձ կատարելով Հայաստանի ազգային ընտրանուն։
Պորտալի պաշտոնական էջերում հրապարակվել է Ազգերի լիգայի ցածր վարկանիշ ունեցող հավաքականների ցուցակը (37-ից 54-րդ տեղեր), որը գլխավորում է հենց Հայաստանի հավաքականը։
Մեր թիմի ընդհանուր տրանսֆերային արժեքը գնահատվում է 45 միլիոն եվրո, ինչն ապահովում է 37-րդ հորիզոնականը ընդհանուր վարկանիշում։ Այս ցանկում Հայաստանին անմիջապես հաջորդում են Բուլղարիան (40 մլն եվրո) և Հյուսիսային Մակեդոնիան (37 մլն եվրո)։ Աղյուսակը եզրափակում է Լիխտենշտեյնի ընտրանին՝ 625 հազար եվրո արժեքով:
Հատկանշական է, որ Transfermarkt-ն այս գրաֆիկան ներկայացրել է Հայաստանի հավաքականի ավագ Էդուարդ Սպերցյանի լուսանկարով՝ հրապարակումն ուղեկցելով հետևյալ գրառմամբ.
«Փոքր շուկայական արժեքներ, մեծ հավակնություններ։ Հայաստանը գլխավորում է այս խումբը, իսկ Լիխտենշտեյնը եզրափակում է Ազգերի լիգայի վարկանիշը։ Ո՞վ կարող է անակնկալ մատուցել»:
Ինչ վերաբերում է Ազգերի լիգայի C2 խմբում մեր մրցակիցներին, ապա ըստ ներկայացված գրաֆիկայի՝ Կիպրոսի հավաքականը 25 մլն եվրո արժեքով զբաղեցնում է 41-րդ տեղը, իսկ Լատվիան 15 մլն եվրո արժեքով 48-րդն է (Չեռնոգորիան չի ընդգրկվել այս աղյուսակում, քանի որ ունի ավելի բարձր վարկանիշ և արժեք):
Հիշեցնենք, որ արդեն այսօր` սեպտեմբերի 25-ին Հայաստանի ազգային հավաքականը կմեկնարկի Ազգերի լիգայի 2026/27 խաղարկությունում՝ Վազգեն Սարգսյանի անվան «Հանրապետական» մարզադաշտում, ժամը 20:00-ին ընդունելով Լատվիայի ընտրանուն։
