Կատալոնական «Բարսելոնայի» և Իսպանիայի հավաքականի հարձակվող Լամին Յամալը կիսվել է ժամանակակից ֆուտբոլի ընկալման վերաբերյալ իր մտքերով և անսպասելիորեն հայտնել, որ մանկության տարիներին հիացել է Մադրիդի «Ռեալի» նախկին կիսապաշտպան Մեսութ Օզիլի խաղով։
«Ես մեծացել եմ այնպիսի ֆուտբոլային ժամանակաշրջանում, երբ մենք հանդիպումներն ամբողջությամբ էինք դիտում՝ առաջինից մինչև 90-րդ րոպեն։ Ես չէի մտնում հավելվածներ՝ ստուգելու, թե ով քանի գոլ է խփել կամ քանի գոլային փոխանցում կատարել։ Այն ժամանակ բոլորը վայելում էին բուն ֆուտբոլը։ Դու կարող էիր հաճույք ստանալ ֆուտբոլիստի խաղից, թեև նա, հնարավոր է, մրցաշրջանում 20 գոլ չէր խփում։ Բայց նա այնպես էր խաղում, որ անհնար էր կտրվել էկրանից։ Օրինակ՝ Օզիլը, որն ինձ շատ էր դուր գալիս»,- նշել է Յամալը Movistar Plus-ին տված հարցազրույցում։
Խոսելով ներկայիս սերնդի մոտեցումների մասին՝ երիտասարդ տաղանդը հավելել է.
«Կարծում եմ՝ ժամանակակից սերունդը պարզապես բացում է հավելվածը, նայում թվերին և ասում. «Լամինը երկու գոլ է խփել կամ երկու ասիստ է արել, նշանակում է՝ նա լավ հանդիպում է անցկացրել»»։
Հիշեցնենք, որ գերմանացի նախկին փլեյմեյքեր Մեսութ Օզիլը իր կարիերայի լավագույն տարիներն առավելապես անցկացրել է Մադրիդի «Ռեալում» (2010-2013 թթ.) և Լոնդոնի «Արսենալում» (2013-2021 թթ.)։
