Վաղը՝ սեպտեմբերի 16-ին, ՈՒԵՖԱ-ի Եվրոպա լիգայի խաղարկության 2026/27 մրցաշրջանի լիգայի փուլի առաջին տուրում Հայաստանի գործող չեմպիոն «Արարատ-Արմենիան» Երևանի Վազգեն Սարգսյանի անվան «Հանրապետական» մարզադաշտում կընդունի չեխական «Սպարտա Պրահային»։
Հանդիպմանն ընդառաջ կայացած նախախաղային ասուլիսի ժամանակ երևանյան ակումբի գլխավոր մարզիչ Մանուել Տուլիպան կիսվել է սպասելիքներով, գնահատել մրցակցի ուժն ու խոսել թիմի մոտիվացիայի մասին.
«Մեկ տարի առաջ մենք խաղացինք «Սպարտայի» հետ և չկարողացանք հաղթել այդ դիմակայությունում, բայց դրանից հետո մեզ համար շատ լավ ժամանակներ սկսվեցին. մենք դարձանք Հայաստանի չեմպիոն և որակավորվեցինք լիգայի փուլ: Իհարկե, մեր հիշողության մեջ վառ է այդ դիմակայությունը, և ես մեծ ցանկություն ունեմ նախորդ տարվա պարտությունից հետո այս անգամ հաղթել:
Շատ բան է փոխվել. նրանց խաղաոճը փոխվել է, ու, իմ կարծիքով, հիմա «Սպարտան» ավելի ուժեղ թիմ է: Նայել եմ նրանց խաղերը, ուսումնասիրել արդյունքները: Այո, նրանց համար լավագույն ժամանակները չեն, բայց ինձ համար դա նորմալ է՝ հաշվի առնելով, որ թիմի կազմը շատ է փոխվել, իսկ նորեկները դեռ ադապտացման կարիք ունեն: Այս մակարդակում ուղղակի անթույլատրելի է նույնիսկ մեկ րոպեով կորցնել կենտրոնացումը, մեզ իսկապես շատ բարդ հանդիպում է սպասում»,- նշել է մասնագետը:
Խոսելով վաղվա խաղում ցանկալի արդյունքի և մոտիվացիայի մասին՝ Տուլիպան ընդգծել է.
«Կարող եմ վստահեցնել, որ մոտիվացիայի խնդիր հաստատ չենք ունենալու: Իհարկե, գիտակցում ենք՝ որքան ուժեղ է մեր մրցակիցը, բայց մեր խնդիրը նրանց թույլ կողմերը գտնելն է: Այնպես չէ, որ կոնկրետ ոչ-ոքիի համար եմ պատրաստում թիմին. մեր գլխավոր նպատակը միանշանակ հաղթելն է: Որևէ պատահականություն չկա, որ հայտնվել ենք այս փուլում: Ինձ համար գլխավորն այն է, որ այս ամենը մենք սովորություն դարձնենք: Սա պետք է լինի ոչ թե ուղղակի պատմական մի պահ, այլ դառնա նորմալ երևույթ մեզ համար, որպեսզի ամեն տարի հասնենք այս մակարդակին»:
Անդրադառնալով վերջերս լեհական «Լեխիա» տեղափոխված, բայց մինչև փետրվար վարձավճարով թիմում մնացող Արթուր Սերոբյանի գործոնին՝ գլխավոր մարզիչը հավելել է.
«Տրանսֆերների վերաբերյալ բնականաբար ակումբն է որոշում կայացնում: Արթուր Սերոբյանը շատ լավ է խաղացել վերջին մեկ տարվա ընթացքում և ճանաչվել տարվա լավագույն ֆուտբոլիստ: Կասկած չունեմ, որ մինչև վերջին օրն այստեղ խաղալիս նա ամեն ինչ կներդնի դաշտում»:
Վերջում մարզիչը հատուկ ուղերձով դիմել է հայ երկրպագուներին.
«Միանշանակ կխնդրեմ, որ գան մարզադաշտ և աջակցեն, որովհետև սա շատ կարևոր պահ է ոչ միայն «Արարատ-Արմենիայի», այլև ողջ հայկական ֆուտբոլի համար: Վստահաբար, խաղի ընթացքում մենք ունենալու ենք դժվարին պահեր, և հենց այդ ժամանակ է մեզ պետք լինելու նրանց աջակցությունը»:
Եվրոպա լիգայի խաղարկության լիգայի փուլի առաջին տուրի «Արարատ-Արմենիա» — «Սպարտա Պրահա» հանդիպումը կմեկնարկի ժամը 20։45-ին։
