Ֆուտբոլի Աշխարհի առաջնության մեկնարկին հաշված օրեր են մնացել։ Հունիսի 11-ին ԱՄՆ-ում, Կանադայում և Մեքսիկայում մեկնարկող գլխավոր ֆուտբոլային ստուգատեսում խաղադաշտ դուրս գալու հնարավորություն կունենա միանգամից 7 եղբայրական զույգ։
Հատկանշական է, որ նրանցից միայն երեքն են ներկայացնում միևնույն ազգային հավաքականը: Այդ ցանկում են Ֆրանսիայի հավաքականի պաշտպաններ Լուկա և Տեո Էռնանդեսները, Կաբո-Վերդեն ներկայացնող Լարոս և Դերոյ Դուարտեները, ինչպես նաև Կյուրասաոյի հավաքականի խաղացողներ Լեանդրո և Ժունինյո Բակունաները:
Այս ցուցակը կարող էր ավելի ընդգրկուն լինել, եթե պաշտպան Յուրիեն Թիմբերը վնասվածք չստանար և հունիսի 8-ին դուրս չմնար Նիդերլանդների հավաքականի վերջնական հայտացուցակից: Այնուամենայնիվ, «Նարնջագույնների» կազմում է մնացել նրա երկվորյակ եղբայրը՝ Քվինտենը:
Մյուս եղբայրները պաշտպանելու են տարբեր երկրների մարզական պատիվը.
- Բրայան Բրոբին կներկայացնի Նիդերլանդները, իսկ նրա խորթ եղբայր Դերիկ Լակասենը հանդես կգա Գանայի կազմում:
- Դեզիրե Դուեն կարող է խաղալ Ֆրանսիայի հավաքականում, մինչդեռ նրա եղբայր Գելա Դուեն կներկայացնի Կոտ դ’Իվուարը: Ի դեպ, նախորդ շաբաթ այս երկու հավաքականները հանդիպեցին ընկերական խաղում. հենց Գելա Դուեի խփած գոլն օգնեց կոտդիվուարցիներին հաղթել 2-1 հաշվով:
- Եղբայրական զույգերի շարքում են նաև Ջոն և Հարի Սաութարները: Ջոնն ընդգրկված է Շոտլանդիայի հավաքականի հայտացուցակում, իսկ նրա եղբայր Հարին՝ Ավստրալիայի:
- Եվ վերջապես, ինչպես և նախորդ մրցաշարերում, Ինյակի Ուիլյամսը կխաղա Գանայի հավաքականում, իսկ Եվրոպայի չեմպիոն Նիկո Ուիլյամսը՝ Իսպանիայի:
Այսպիսով, առաջիկա Մունդիալը խոստանում է լինել ոչ միայն թեժ ֆուտբոլային պայքարի, այլև յուրահատուկ ընտանեկան դիմակայությունների ու պատմությունների հարթակ:
