Սերբիայի Զրենյանին քաղաքում շարունակվող ազատ ոճի ըմբշամարտի Եվրոպայի Մ23 տարեկանների առաջնությունում Հայաստանի հավաքականը ևս մեկ մեդալ է ավելացրել իր ակտիվում: Այս անգամ պատվո հարթակին է բարձրացել 125 կգ քաշային Խաչատուր Խաչատրյանը։
Բրոնզե մեդալի համար վճռորոշ գոտեմարտում հայ ըմբիշը մրցել է Բելառուսի ներկայացուցիչ Ստյապան Մանդրիկի հետ։ Խաչատրյանը փայլուն ելույթ է ունեցել և գորգ դուրս գալուց ընդամենը 40 վայրկյան անց վստահ հաղթանակ է տոնել մրցակցի նկատմամբ։ Այս տպավորիչ հաջողության շնորհիվ հայ մարզիկն իր կարիերայում արդեն երկրորդ անգամ հռչակվել է Եվրոպայի երիտասարդական առաջնության բրոնզե մեդալակիր։
Նշենք, որ մրցումային այսօրվա ընթացքում երրորդ տեղի համար պայքարելու հնարավորություն ուներ նաև մեր թիմի մեկ այլ ներկայացուցիչ՝ 92 կգ քաշային Կնյազ Իբոյանը։ Վերջինս, սակայն, չի կարողացել հաղթահարել ռուսաստանցի Մուստաֆագաջի Մալաչդիբիրովի արգելքը և անմասն է մնացել մեդալներից։
