«Կրասնոդարի» և Հայաստանի ազգային հավաքականի կիսապաշտպան ու ավագ Էդուարդ Սպերցյանը Ֆյոդոր Սմոլովի Smol Talk YouTube-յան նախագծի եթերում անդրադարձել է ձմեռային տրանսֆերային պատուհանի ընթացքում անգլիական «Լիդսի» հետ կապված միջադեպին՝ խոսելով ակումբի կողմից դրսևորված անհասկանալի մոտեցման մասին:
Ֆուտբոլիստի հավաստմամբ՝ տրանսֆերային պատուհանի փակվելուց ընդամենը մեկուկես օր առաջ իրեն զանգահարել է անհայտ մի անձ և տեղեկացրել, որ «Լիդսը» պատրաստ է պաշտոնական առաջարկ անել՝ վարձակալություն՝ հետագայում տրանսֆերային իրավունքը գնելու պայմանով։
«Ես նրան հարցրի. «Ինչո՞ւ եք ինձ զանգահարում, ընդհանրապես ովքե՞ր եք դուք»: Ես գործակալ չունեմ, ուստի հորդորեցի ուղիղ ակումբ զանգահարել: Պատուհանի փակմանը մնացել էր ընդամենը մեկ օր, ուստի ես այդ զրույցին ամենևին լուրջ չվերաբերվեցի: Ցավոք, նման դեպքեր անընդհատ են գրանցվում»,- նշել է Սպերցյանը:
Զրույցի ընթացքում հիշատակվել է նաև, որ անգլիական ակումբը հայ կիսապաշտպանի ծառայություններով ակտիվորեն հետաքրքրվել է նաև նախորդող ամռանը և նախորդ ձմռանը, սակայն գործընթացն այդպես էլ տրամաբանական ավարտի չի հասել:
Արձագանքելով այն դիտարկմանը, թե վերջին օրով նման պայմաններով առաջարկ անելն անհարգալից վերաբերմունք է և տպավորություն է ստեղծում, թե խոսքը ոչ բարձրակարգ առաջնության ֆուտբոլիստի մասին է, Սպերցյանը հավելել է.
«Առավել ևս, որ ես վստահ եմ՝ նրանք ունեն ակումբի ղեկավարության կոնտակտները: Եթե իրոք ցանկանում եք կամ մտածում եք այդ տրանսֆերի մասին, ապա միանգամից ակումբ զանգահարեք: Ստացվում է այնպես, որ ամեն կես տարին մեկ ինձ տարբեր մարդիկ են զանգահարում՝ առանց որևէ լուրջ քայլի»:
Նշենք, որ ընթացիկ մրցաշրջանում 25-ամյա կիսապաշտպանը բոլոր մրցաշարերում մասնակցել է 25 հանդիպման՝ դառնալով 9 գոլի և 13 արդյունավետ փոխանցման հեղինակ։
