Ինչպես արդեն տեղեկացրել էինք, «Լիվերպուլի» և Պորտուգալիայի ազգային հավաքականի հարձակվող Դիոգու Ժոտան մահացել է 28 տարեկան հասակում Իսպանիայի Սամորայի գավառում տեղի ունեցած ճանապարհատրանսպորտային պատահարի հետևանքով։ Վթարը տեղի է ունեցել հինգշաբթի առավոտյան A-52 ավտոմայրուղու 65-րդ կիլոմետրում՝ Սանաբրիայի շրջանում։
Պորտուգալիայի ֆուտբոլի ֆեդերացիան քիչ առաջ հայտարարություն է տարածել։
Պորտուգալիայի Ֆուտբոլի Ֆեդերացիան և ամբողջ պորտուգալական ֆուտբոլային համայնքը խորապես վշտացած են Դիոգու Ժոտայի և նրա եղբոր՝ Անդրե Սիլվայի մահվան կապակցությամբ, ովքեր անցած գիշեր զոհվել են Իսպանիայում տեղի ունեցած ողբերգական ավտովթարի հետևանքով։
Դիոգո Ժոտան ոչ միայն տաղանդավոր ֆուտբոլիստ էր, ով գրեթե 50 խաղ է անցկացրել Պորտուգալիայի ազգային հավաքականի կազմում, այլև բացառիկ անձնավորություն՝ հարգված թե՛ թիմակիցների, թե՛ մրցակիցների կողմից: Նա ուրախություն էր պարգևում բոլորին և օրինակ էր ծառայում իր համայնքի համար։
Պորտուգալիայի Ֆուտբոլի Ֆեդերացիան իր խորին ցավակցությունն է հայտնում Դիոգուի և Անդրե Սիլվայի ընտանիքին, ընկերներին, ինչպես նաև «Լիվերպուլ» և «Պենաֆիել» ակումբներին, որոնց կազմում համապատասխանաբար հանդես էին գալիս եղբայրները։
Ֆեդերացիան դիմել է ՈւԵՖԱ-ին՝ խնդրելով մեկ րոպե լռություն հայտարարել հինգշաբթի օրը կայանալիք կանանց Եվրոպայի առաջնության Պորտուգալիա – Իսպանիա խաղից առաջ՝ ի հիշատակ նրանց։
Պորտուգալական ֆուտբոլը անդառնալի կորուստ է կրել Դիոգո և Անդրե Սիլվայի մահվան հետևանքով: Մենք կորցրել ենք երկու չեմպիոնի, և նրանց ժառանգությունը պատշաճորեն հիշելու ու փառաբանելու համար կանենք հնարավոր ամեն ինչ:
