«Նոայի» 28-ամյա ֆրանսիացի հարձակվող Վիրջիլ Պինսոնը ծավալուն հարցազրույց է տվել ֆրանսիական հեղինակավոր Le Figaro պարբերականին, որում պատմել է հայկական թիմում իր ելույթների, Հայաստանի և այլնի մասին:
Ներկայացնում ենք ֆրանսիական պարբերականի հոդվածը՝ ամբողջությամբ:
«Աբովյանի համեստ մարզադաշտում (3100 տեղ) «Նոան» լիգայի 8-րդ տուրում հաղթել է «Փյունիկին» 2-0 հաշվով: Այդ երեկո թիմի հաղթանակը ապահովել է պորտուգալացի հարձակվող Գոնսալո Գրեգորիուն, սակայն ուշադրության կենտրոնում հայտնվել է նրա թիմակիցը։
«Իմ ընկերը՝ Գրեգը, մեկ գոլ խփեց ու փոխանցում կատարեց։ Ես պարզապես մեկ գոլ խփեցի (երկրորդը), բայց երկրպագուներն իմ անունն էին վանկարկում։ Դաշտում նա ինձ հարցրեց՝ «Ինչու՞ երկրպագուներն իմ անունը չեն վանկարկում»: Հիշում եմ ու ծիծաղում»,- պատմում է Պինսոնը ժպիտով։
28 տարեկանում ֆրանսիացին կամաց-կամաց նվաճում է ակումբի երկրպագուների սրտերը։ Նա միացավ «Նոային» մարտին՝ ազատ խաղացողի կարգավիճակում։ «Երկրպագուներն իսկապես ինձ սիրում են այստեղ։ Թվում է, թե դա իմ ոճի՝ դրիբլեր անելու և նաև փոքր-ինչ շոու անելու շնորհիվ է», — ասում է ձախ եզրայինը, որը դեռևս հիանում է Նեյմարով և երբեմն նույնիսկ կրկնօրինակում է բրազիլացուն՝ մազերը ներկելով:
Այդուհանդերձ, համեմատությունն այստեղ ավարտվում է: Պինսոնը, իհարկե, հեռու է ՊՍԺ-ի նախկին աստղի ճանաչումից, բայց կյանքը Հայաստանում մինչ այժմ խաղաղ է անցնում։ «Հայաստանն այնքան էլ ֆուտբոլային երկիր չէ։ Այստեղ ավելի հանգիստ է։ Նույնիսկ երբ ռեստորան ես գնում, ոչ ոք չի նկարում»,- ասում է Պինսոնը՝ հավելելով, որ իրավիճակն արագ փոխվում է. «Մի քանի օր առաջ, երբ փողոցում էի, մի զույգ կանգնեցրեց ինձ՝ «Ա՛հ, Պինսոն»։ Սկսվում է…»։ Հայտնիության առաջին նշանները երևում են, բայց ֆրանսիացին նախընտրում է մնալ հանգիստ։
Երևան է տեղափոխվել միայնակ՝ առանց իր ընկերուհու ու երեխաների։ Ընտրել է առաջին իսկ հանդիպած բնակարանը, որը գտնվել է արդեն իսկ այնտեղ բնակվող իր թիմակցի՝ Գոռ Մանվելյանի կողքին։ Նոր միջավայրում հարմարվելուց հետո, Պինսոնը նույնիսկ դարձել է կարիերայի խորհրդատու իր նախկին թիմակիցների համար։
«Սանգարեի հետ մենք խաղացել ենք QRM-ում (Կեվիլի-Ռուան Մետրոպոլ)։ Նա ինձ զանգեց՝ հարցնելով, թե ինչպես է ակումբում։ Ես բացատրեցի մեր նպատակները, ու ինձ թվաց՝ նա անմիջապես համաձայնվեց: Ըստ իս, նա նորից ցանկանում էր խաղալ ինձ հետ»,- ծիծաղում է։
Այս երկու խաղացողները 2020/2021 մրցաշրջանում միասին հանդես են եկել Կեվիլիում՝ Լիգա 2-ում, երբ երիտասարդ Պինսոնը դեռ փորձում էր գտնել իր տեղը՝ «Անտալիասպորում» (Թուրքիա) կարճ ժամանակ խաղալուց և Լիգա 1-ում «Ռեյմսի» կազմում մեկ հանդիպում անցկացնելուց հետո։
«Իհարկե, կուզենայի Լիգա 1-ում խաղալ՝ այնտեղ, որտեղ կնքել եմ առաջին պայմանագիրս։ Սակայն դա իմ ուղու մասն էր։ Կարծում եմ՝ այն ժամանակ դեռ պատրաստ չէի՝ ֆիզիկապես և հոգեբանորեն։ Այսօր, ես ամբողջությամբ տրվում եմ ֆուտբոլին»,- նշում է Պինսոնը, որը բազմաթիվ ակումբներում լինելուց հետո տեղափոխվել է Հայաստան, իսկ այս ուղին անվանում է «աննախադեպ»։
Անդրադառնալով Լոնդոնի «Չելսիի» հետ նոյեմբերի 7-ին կայանալիք խաղին՝ Պինսոնն ասել է. «Սթեմֆորդ Բրիջը» հիանալի կլինի, բայց մենք այնտեղ չենք գնալու տպավորվելու համար»:
