«Եթե մարդ չի գտնում մի բան, որի համար պատրաստ է մեռնել, նա չի ապրում»: Ես ապրում եմ, որովհետև գտել եմ Հայաստանը»: Հայաստանի հանդեպ սերը մի անգամ այսպես բնութագրեց Արիանե Կաոիլին՝ գրոսմայստեր Լևոն Արոնյանի կինը, որն այս գիշեր անժամանակ հեռացավ կյանքից:
Ֆիլիպինյան ծագումով ավստրալացի շախմատիստուհի, ՖԻԴԵ-ի կանանց միջազգային վարպետ Կաոիլին 2013 թվականից բնակվում էր Հայաստանում, սիրում էր Հայաստանն ու Հայաստանի մասին խոսելիս միշտ ասում էր «մեր երկիրը», «մեր մշակույթը», «մեր ժողովուդը» … ծնվել էր Ֆիլիպիններում, ապրել՝ Գերմանիայում, ԱՄՆ-ում, Ավստրալիայում, եղել ավելի քան 65 երկրում, բայց ասում էր՝ միայն Հայաստանում է իրեն տանը զգում:
Ասում էր՝ ցանկանում է մինչև կյանքի վերջն ապրել Հայաստանում, ընտանիք կազմել Հայաստանում ու այստեղ մեծացնել իրենց երեխաներին … երեխաներ ունենալ գեղեցիկ զույգը, ցավոք, չհասցրեց, իսկ ընտանիք կազմեցին 2017 թվականին. Արոնյանն ու Կաոիլին միմյանց հավերժ սիրելու երդում տվեցին Սաղմոսավանքում, իսկ հարսանեկան արարողությունը շարունակեցին անչափ գեղեցիկ միջավայրում, որտեղ Արիանան ևս մեկ անգամ զարմացրեց հյուրերին՝ ասմունքելով Չարենցի «Ես իմ անուշ Հայաստանի»-ն։
Ի դեպ, հարսանիքից օրեր առաջ Արոնյանը Թբիլիսիում անցկացված Աշխարհի Գավաթի խաղարկությունում արժանացել էր հաղթողի կոչմանը և նվաճել էր նաև Աշխարհի չեմպիոնի հավակնորդների մրցաշարի ուղեգիր:
«Բառեր չունեմ նկարագրելու իմ ցավը կնոջս՝ Արիանեի մահվան կապակցությամբ»,- գրեց Արոնյանը Թվիթերի իր էջում:
Արոնյանին իրենց ցավակցությունները հղեցին անվանի շախմատիստներ Մագնուս Կարլսենը, Մաքսիմ Վաշիե-Լագրավը, Սերգեյ Կարյակինը, Անիշ Գիրին, Պավել Էլյանովը, Յուդիթ Պոլգարը և ուրիշներ։
I have no words to express the grievance over my wife Arianne’s death. She was intelligent , hard working and joyous person that lived a beautiful life…
— Levon Aronian (@LevAronian) March 30, 2020
I love you honeybun, sleep tight….
Արիանեն Լևոնի առաջին երկրպագուն ու խորհրդատուն էր.
«Հավատում եմ նրան, նրա ուժին և բնավորությանը: Ոչ ոք չգիտի, թե ինչի միջով է նա ստիպված եղել անցնել: Ոչ ոք չգիտի, թե որքան ուժ և ժամանակ է նա ծախսում շախմատի վրա, ինչ է զոհաբերում հանուն դրա: Բայց, եթե նա չի դարձել աշխարհի չեմպիոն այս տարի, ապա, համոզված եմ, որ գիտի, որ չեմպիոն կդառնա մյուս տարի»,- տարիներ առաջ «Նովոստի-Արմենիա» գործակալությանը տված հարցազրույցում ասել էր նա:
Իսկապես, Լևոնը կորցրեց ոչ միայն սիրելի կնոջն ու կյանքի ընկերոջը, այլև իր ամենամեծ աջակցին:
Արիանեն բազմազբաղ ու տարբեր հետաքրքրությունների տեր անձնավորություն էր: Լինելով մասնագիտությամբ տնտեսագետ, ունենալով ՖԻԴԵ-ի կանանց միջազգային վարպետի կոչումը՝ նա այս ամենով չէր սահմանափակվում:
Արիանեն 2018-ին հայ մանուկներին նվիրված աննախադեպ նախաձեռնությամբ հանդես եկավ: Նա հեծանվարշավի շնորհիվ դրամահավաք իրականացրեց Հայաստանի մանուկներ հիմնադրամի՝ Տավուշի մարզի սահմանամերձ գյուղերի համար։
Հեծանվարշավը Կաոիլին մեկնարկեց Հայաստանի անկախության օրը՝ սեպտեմբերի 21-ին, հեծանիվով անցավ մոտ 1 900 կիլոմետր ճանապարհ Թուրքիայի և Իրանի միջով դեպի Հայաստան:
Արիանեն նաև լեռնագնացության մեծ սիրահար էր. 2015-ին նա հաղթահարեց Արարատի բարձունքը.
«Գիտեի, որ դասագրքային տեղեկություններից զատ, այստեղ նոր բան եմ գտնելու: Եվ գտա: Լեռներն էին` բարձր, վեհ, գեղեցիկ: Լեռնագնացությունն իմ սիրելի զբաղմունքներից մեկն է: Առհասարակ, հայկական բնաշխարհը յուրահատուկ գեղեցիկ է: Հայաստան ինձ սովորեցրել է սիրել բնությունը»,- մի անգամ ասել է Կաոիլին:
Հայաստանում Արիանեն զբաղվել է նաև հասարակական գործունեությամբ. 2016 թվականից Երևանում լույս տեսնող «Ճամփորդ» շաբաթաթերթի գլխավոր խմբագիրն էր, իսկ 2017 թվականին եղել է նաև ՀՀ վարչապետի խորհրդականը՝ հասարակական հիմունքներով:
«Ինձ թվաց, որ Հայաստանի տպագիր մամուլում ոգեշնչող և հետաքրքիր հոդվածների պահանջարկ կա: Ես ուղղակի ցանկանում եմ ընթերցողների ուշադրությունը գրավել այն հարցերին, որոնք անտեսում են այլ լրատվամիջոցները»,- ասում էր նա:
Հայաստանի, մեր երկրի, բնության, մշակույթի ու մարդկանց մասին իսկապես հոգ տանող ու անհանգստացող Արիանեն ընդամենը 33 տարեկան էր … և դեռ այնքան բան ուներ անելու՝ աշխարհը փոքր-ինչ ավելի բարի ու լավը դարձնելու համար:
Արիանեին սիրում էին բոլորը, նրա անժամանակ մահվան հետ էլ, թերևս, ոչ ոք չի կարողանում համակերպվել՝ թե՛ իրեն անձամբ ճանաչողները, և թե՛ անծանոթները … կյանքն իսկապես շատ անկանխատեսելի ու դաժան կարող է լինել:
Հանգչի՛ր խաղաղությամբ, Արիանե …
