Հայաստանի հավաքականի կենտրոնական պաշտպան Հայկ Իշխանյանը, որը հունվարի վերջին «Ալաշկերտից» տեղափոխվեց «Ժետիսու», ղազախական ակումբի հետ մինչև տարվա վերջ պայմանագիր կնքելով, արդեն հեռացել է թիմից:
Այս մասին իր Տելեգրամ-ալիքում հայտնել է sport.inform.kz-ի խմբագիր Այդին Կոժախմետը:
«Մի քանի անգամ լսել եմ «Ժետիսուի» գլխավոր մարզչի՝ Դմիտրի Օգայի կողմից ֆուտբոլիստների նկատմամբ բռնապետական մոտեցումների մասին: Դաշտում կարգապահության հետ կապված ամեն ինչ պարզ է, բայց առօրյա կյանքում կարգապահության տեսանկյունից հարգարժան մասնագետի մոտ երբեմն ծայրահեղության է հասնում:
Վաղուց խոսակցություններ էին պտտվում, թե ինչպես է Օգայը զորանոցային կարգեր հաստատել «Ժետիսուում». նախաճաշին, ճաշին և ընթրիքին ամբողջ թիմը պետք է ներկայանա միանման գուլպաներով (առանց գուլպաների մուտքը արգելվում էր):
Բայց ինձ համար ամենատարօրինակն այն էր, որ մարզումների ժամանակ արգելվում է ծիծաղը: Ավելին, նույնիսկ ժպտալն է արգելված մարզումների ժամանակ:
Անկեղծ ասած, ես չէի հավատում դրան: Պարզապես այն պատճառով, որ նման բան երբեք չեմ հանդիպել: Կարծում էի՝ ֆուտբոլիստները չափազանցնում են: Դե, ինչպե՞ս կարելի է արգելել մարզման ժամանակ ժպտալը: Չէ՞ որ, թաղման բյուրո չէ, վերջիվերջո: Բայց, ամենայն հավանականությամբ, ես չարաչար սխալվել եմ, և Օգայի թիմերի կանոնները ոչնչով չեն տարբերվում նրանցից, ինչ կա ծիսական արարողությունների ժամանակ:
Մի խոսքով, 2 օր առաջ Հայաստանի հավաքականի ֆուտբոլիստ Հայկ Իշխանյանը որը հունվարի վերջին պայմանագիր էր կնքել «Ժետիսուի» հետ, Օգայի կողմից հեռացվել է մարզումներից, ինչից հետո առհասարակ տուն է ուղարկվել: Իշխանյանը կա՛մ ժպտացել է մարզման ժամանակ, կա՛մ էլ արևից է դեմքը ծռմռվել: Դա նկատել է գլխավոր մարզիչն ու զայրացած հարձակվել է ֆուտբոլիստի վրա: Խնդիրը մեկն էր՝ ժպիտը: Արդյունքում, ֆուտբոլիստին հայտնել են, որ խզում են իր հետ պայմանագիրն ու հեռացրել են թիմից: Այդպիսի բաներ»,- գրել է Կոժախմետը:
Ղազախստանի նոր առաջնության առաջին տուրում՝ մարտի 7-ին, Դմիտրի Օգայի սաները կմրցեն «Կասպիի» հետ:
