«Ճապոնիայի համար մեծ պատիվ է ընդունել Օլիմպիական խաղերը»,- այս մասին այսօր «Արմենպրես»-ի մամուլի սրահում լրագրողների հետ հանդիպման ժամանակ նշել է ՀՀ-ում Ճապոնիայի արտակարգ և լիազոր դեսպան Ջուն Յամադան։ Դիվանագետի ասուլիսի թեման Տոկիոյում կայանալիք 32-րդ ամառային Օլիմպիական խաղերն էին։
Ի՞նչ փուլում են նախապատրաստական աշխատանքները
Դեսպան Յամադան նախորդ տարվա վերջում է եղել Ճապոնիայում և հնարավորություն ունեցել անձամբ ստուգելու նախապատրաստական աշխատանքների ընթացքը։ Այժմ գրեթե ավարտվում է նախապատրաստական փուլը և վերջինս հուսով է, որ շատ լավ արդյունք կգրանցեն, որը մեծ հաջողություն կլինի ոչ միայն Ճապոնիայի համար, այլև՝ ամբողջ աշխարհի։
Ճապոնիայում կառուցվել է նոր մարզադաշտ, որը կարող է 68 000 հանդիսատես ընդունել․ այն կառուցվել է 3 տարում։ Սա երկրորդ անգամն է, որ ամառային Օլիմպիական խաղերը անցկացվելու են Ճապոնիայում և դեսպանը նկատում է, որ 1964 թ․ կայացած Օլիմպիական խաղերից մնացած ենթակառուցվածքների մեծ մասը դեռ օգտագործման ենթակա են։ Օլիմպիական խաղերը շատ ծախսատար է, աշխատատար, սակայն Ջուն Յամադան վստահ է՝ իրենք կկարողանան հաղթահարել և պատվով դուրս գալ իրավիճակից։
«Ճապոնիայի համար Օլիմպիական այս խաղերը հատուկ նշանակություն ունեն: Ունենք մեկ ընդհանուր գաղափար՝ «Օլիմպիական խաղերը համայն մարդկության համար» և մեկ կարևոր ուղերձ՝ «ինչպես լինել ներդաշնակ բնության հետ»: Ուզում ենք աշխարհին ցույց տալ, թե ինչպես է վերականգնվել մեր երկիրը 2011 թվականի ցունամիից հետո։ 1964-ին մենք ցույց տվել ենք արդեն, թե ինչպես էր Ճապոնիան վերականգնվել Երկրորդ համաշխարհայինից հետո»,- նշում է Յամադան:
Հայաստանի մարզիկներին կհյուընկալի Մինամիայզու քաղաքը
Այս տարի Ճապոնիայում մեկ նորամուծություն ևս կլինի։ Ամեն երկրի մարզական պատվիրակությանը կընդունի ճապոնական մի քաղաք․ Հայաստանի հավաքականին կհուրընկալի Մինամիայզու քաղաքը։ Այդ քաղաքը որոշել է հյուրընկալել Հայաստանի հավաքականին այն պատճառով, որ տեղի բնակչությունը և քաղաքային իշխանությունները բավականին հետաքրքրված են ըմբշամարտով։ Օլիմպիական խաղերի ավարտից հետո Հայաստանի ներկայացուցիչները կգնան այդ քաղաք, այնտեղ կհանգստանան, և ինչպես նշում է դեսպանը՝ «հուսով ենք, նաև կտոնեն նվաճած հաջողությունները»։
«Ցավում եմ, որ մինչ օրս Հայաստանի և Ճապոնիայի քաղաքների միջև համագործակցություն չկա, չկան քույր քաղաքներ»,- ավելացնում է Ջուն Յամադան։ Ճապոնական կողմն այդ ամենը կոորդինացնում է ՀԱՕԿ-ի հետ, որի հետ սերտ կապերի մեջ է։
Կորոնավիրուսը և մասնակիցների ու հյուրերի անվտանգության հարցը
Հուլիս-օգոստոս ամիսներն ամենախոնավ և շոգ ժամանակահատվածն է Ճապոնիայում, և կազմակերպիչները փորձելու են ամեն ինչ անել, որպեսզի ապահովեն մարզիկների և մրցաշարի համար ժամանող զբոսաշրջիկների հարմարավետությունը։ Պրն․ Յամադան նշում է, որ, օրինակ, մարաթոնը կկայանա հյուսիսային քաղաքում (Սապորո, խմբ․)։
«Ճապոնիան շատ ապահով երկիր է համարվում և մեր երկիրն անելու է ամեն ինչ՝ խաղերը բարձր մակարդակով անցկացնելու համար, հատկապես՝ անվտանգության տեսանկյունից։ Ինչ վերաբերում է կորոնավիրուսին, ապա ես լավատես եմ և հույս ունեմ, որ գարնան գալու և եղանակների տաքացման հետ կապված՝ վիրուսը կնահանջի»,- շեշտում է դեսպան Յամդան և հավաստիացնում, որ համաճարակի պատճառով Օլիմպիական խաղերը չեն հետաձգվի։
Այս պահին Ճապոնիա մեկնելու համար անհրաժեշտ է վիզա ստանալ ՀՀ քաղաքացիներին։ Վիզաները տրամադրվում են 4 օրվա ընթացքում։
32-րդ ամառային Օլիմպիական խաղերը կհյուրընկալի Տոկիոն․ այն կմեկնարկի հուլիսի 24-ին և կեզրափակվի օգոստոսի 9-ին: Տարվա մարզական գլխավոր իրադարձությանը կասնակցեն 11 հազարից ավել մարզիկներ ամբողջ աշխարհից։
