«Վուլվերհեմփթոնի» և Մեքսիկայի հավաքականի հարձակվող Ռաուլ Խիմենեսը շարունակում է վերականգնվել սարսափելի վնասվածքից, որը ստացել էր 2020 թվականի նոյեմբերին։
Sky Sports-ը հայտնում է, որ Ռաուլը մինչև կարիերայի ավարտը հանդես կգա պաշտպանիչ գլխարկով։
«Խիմենեսը շատ լուրջ վնասվածք է ստացել կես տարի առաջ՝ նոյեմբերի 29-ին, և Լոնդոնի հիվանդանոցներից մեկում անհապաղ վիրահատվել էր գանգի կոտրվածքի պատճառով։ Վերականգնումը լավ է ընթանում, բայց մինչև կարիերայի ավարտը նա ստիպված պետք է լինի փակել վնասված հատվածը։ Այս բնագավառում լավագույն բժիշկները նրա օրգանիզմը բավականին ուժեղ են գնահատել՝ ֆուտբոլիստի կարիերան շարունակելու համար, բայց նա դա անպայման պետք է անի պաշտպանիչ գլխարկով։
Մարտից սկսած Ռաուլը կարողացավ բազային ֆիզիկական ծանրաբեռնվածությունից անցնել դեպի լիարժեք պրոֆեսիոնալ մարզումների՝ բացառությամբ օդում ուժային պայքարի և գլխով լիարժեք խաղի։ Վերջին օրերին նա ստացել է բժիշկների թույլտվությունը, որպեսզի նաև դա անի։
Հույս ունենք և սպասում ենք, որ Ռաուլ Խիմենեսը կկարողանա լիարժեք դերակատարություն ունենալ «Վուլվերհեմփթոնի»՝ 2021/2022 մրցաշրջանի հաջողություններում»,- ասել է անգլիական ակումբի բժշկական շտաբի ղեկավարը։
Հիշեցնենք՝ ԱՊԼ-ի 10-րդ տուրի՝ «Արսենալ»-«Վուլվերհեմփթոն» խաղի 5-րդ րոպեին ցավալի բախում է տեղի ունեցել Դավիդ Լուիսի ու Ռաուլ Խիմենեսի միջև։ Բրազիլացու մոտ ճակատի պատռվածք էր գրանցվել, վերքն ամբողջ առաջին կեսի ընթացքում արյունահոսում էր ու թույլ չտվեց ֆուտբոլստին խաղն ավարտին հասցնել։ Խիմենեսի մոտ ամեն ինչ շատ ավելի լուրջ էր։ Խաղի դադարը մոտ 10 րոպե տևեց, ինչի արդյունքում Խիմենեսին պատգարակով դուրս բերեցին խաղադաշտից, նա նաև թթվածնային դիմակի կարիք ունեցավ։
